抽多一點時間回家吃飯 (100629)

J經常需要晚上工作，很多時候放工都已經十點幾十二點，要係外面醫肚。逢星期六日晚，大哥都會回家食飯，但好多時候，J因為要工作，星期六日都唔多係屋企食。不過，聽阿媽講，J一係唔度，年紀好大的老豆就會係阿哥仲食緊飯既時候開始收拾飯菜，令到氣氛好差。

昨晚有時間番屋企食飯，J終於目睹呢一幕了，雖然情況比J唔係度時好一點，但見到阿哥好唔開心，令到我都好唔開心。雖然J同阿哥從少都好疏離，但係，始終都係一家人。

J同大佬相差九年，自懂事後就知道老豆好討厭阿哥，可能覺得佢讀書唔好，又冇咩點拎錢番屋企。J有次打開阿哥的命盤，原來阿哥細細個就已經「陽梁昌祿」，即係讀書成績好好，問番阿媽，果然又係！不過因為當時家庭環境令阿哥讀書上有些阻滯，就是這個阻一阻，就令其後三十年都好浪蕩。一個人既決定，就影響左另一個人一生。

一家人，有時好難計對錯，亦都無謂計，J只希望，可能抽多點時間番屋企食飯，起碼，有J係度，老豆會克制些少。

阿哥其實宜從事帶藝術性質的職業，可惜現職與藝術拉不上丁點關係。

J昨晚知道阿哥黎食飯，專登買《葉問2》等食飯一齊睇，劇中是以少年李小龍要拜葉問為師作結，阿媽就話李小龍好打過葉問，J問點解，媽子答因為李小龍出名過佢師父囉。

如果哥哥當年讀唔成書，走去畫漫畫，又或者繼續做廚房(阿哥對食好有要求，福德宮見天廚是也)，今天成就可能會更好，可惜，人生邊有「如果」。

幸福非必然，希望所有身在健康家庭的朋友都懂得惜福，甚至為下一代建立一個安樂的家庭吧。