迷信？(080129)

第一次、亦是唯一一次拜會蔣先生是零七年二月的某天，那是個有趣的經驗，那日的感受亦散見此blog中。 當天急忙間竟帶錯了星盤，結果問不到原先想問的事。而因為咁就啟發左我自學既興趣。自學殊不容易，尤是我這種國學根基極差，連天干地支都未識數之流，一年以還，連基本常識的根基都未攪得懂。

今日返工時，正琢磨日後仲有冇機會再同蔣生傾計，因為我有好多事想請教佢，殊不知，下午有朋友打俾我，話新年後會同佢做訪問，仲叫埋我一齊去。嗯，今次我不會拿住我個盤去問佢了，而會問佢點樣分析一個盤。

蔣的同門師第葉漢良現正出版一套《斗數卷》，將佢地師傅王亭之係八十年代撰寫的《中州派紫微斗數講義》重新演繹，卷二已經見街，有興趣既朋友可以去書局找找。

如果‧如果(080128)

是星期六的早上，終於的起心肝去上環。在古老的店舖中尋覓要去的地方，明明都不是第一次去了，卻找來找去都找不著。

找到了，急急忙忙的找了個位置座下，是最後排的位置。定過神來，四處張望，嗯，旁邊的人都拿著書聽講。怎生人人都脫了鞋，而我卻是仍穿著鞋子呢，一定是我「唔知訂」了。不好意思的把鞋脫下，沿後排走到門口，放在入口處，又買了本導讀的書，返回座位。

***

有時會想，如果那時做了不一樣的決定，往後我又會有一個怎樣的發展。我身邊的人，又會有怎麼的影響。

如果六十年前，我公公跟隨「過聞黨」一起到了台灣，那我媽媽之後的命運就不一樣了。而之後，仍會有今日的我嗎？如果我生在台灣，那我現在又會是一個怎樣的人？我應該認識不到你們吧。

想想，很是有趣。想得入神，尤其是想到近幾年發生的事，環環緊扣，不由得感到前因後果之微妙幽深。

我們一個簡單決定，又會影響身邊幾多人？願我們都有平常清淨的心，作每一個決定吧。

***

三月又會去台灣，是第三次去台灣了吧。

機緣‧巧合(080119)

是十月尾十一月頭吧，記不起是那一天了，有人跟我說：「不如你試試應徵吧。」最初的回應，不外乎「搵d咁既野黎攪呀」，「我得唔得架」等等not to run but run away的話。經過幾番內心掙扎，由初初的猶豫不決到最後積極備戰，在十一月下旬的某天晚上，收到一個電話：「恭喜你，你已經正式成為......」。

備戰期間接觸過好幾個人，本來純粹是想交流意見，結果串連了幾個重要人物，最後竟然變成一個「買一送一計劃」。如果當中沒有巧合，就不會有今天的局面。今日，我終於可以確定office的未來工作班底。

一切都已準備就緒、如箭在弦，我們都欠缺經驗，但欠缺經驗又如何！我們有就是拚勁衝勁，肯搏肯捱肯創新。心情真是興奮，很期待正式埋班的一天！

很快，又是另一個四年。現在的心情跟四年前一樣，誠惶誠恐！四年如夢一般的過去了，那時是人生的一個重要轉捩點、分水嶺。那時候認識了很多朋友，亦邂逅我深愛的人。

我相信我大部份時間都可以好好的享受工作。入行四載入職兩年，慶幸熱誠未減！

***

今天的心情是平淡恬靜，上午回到office執拾一下凌亂的桌面(因為同事經常戲言在我的桌面上找到他們要找的東西文件)。看一看投資組合，嗯，總覺得證明自己的眼光比實際數字上的增長更加有趣。能夠做喜歡的事，我非常滿足。

希望你也會在做你喜歡的事，見你喜歡的人吧。

安心月供(080117)

面對單日股市大趺1,300點，只得輕嘆奈何，因為手上未有足夠現金購買愛股(5, 941, 2628)。現金有限，只掛左牌買1手3968，聽日就知買唔買到。如果下個月個市仲係徘徊係25,000-26,000左右，就會繼續月供5,000元941及4,000元2628，正考慮會否用多3,000元供005。

投資組合由年頭到今日已經趺左15%，即係帳面唔見左六萬元左右，不過仍是一股不沽，反而早幾日去左獅子銀行提取所有股票。六萬元唔係一個少數目，不過要在股市裡生存，就一定要面對大升市既亢奮同埋大趺市既恐慌，趺市，只不過生活既一部份，冇咩需要驚。亦因為咁，有時遠離股市比緊貼個市會更能作出冷靜的決定。

希望有股票係手既朋友都會擁抱手中既「千里馬」，唔好輕易放佢地走。

邊緣回望(080115)

早上收到幾封由老闆們發出的感謝email，肯定過去幾天的努力。晚上和同事稍作檢討，他們都說，這是我上任以來的第一次大型活動亦是任職以來「最不順心」的一次。是的，一點也不順心。星期六，原本約定所有人中午十二時等，一切亦已在先前一日準備就緒。

上午十時多，同事來電，告訴我全幢大廈突然停電，最快要晚上先有電！一掛線，用梳洗的時間想好如何應變，事實亦都冇咩可以應變，在回公司的途上撥幾個電話叫同事早一點番工，到達現場，和幾位同事/組織的人打所需物資由office搬落黎。到晚上做完野，返office仲係冇電，由於星期日又有活動，因此又要行多次上樓更替物資。

而家，有時間回望一下當時有位朋友的反應。

朋友甲，早上在睡夢中收到電話，馬上趕到現場，二話不說同我一起行上office，又幫我把最重的物資搬落黎。經過一個下午的勞動後，晚上要搬番d物資上去，佢都自願的挑最重的物資搬上去。沿途扯哂蝦。

同事跟我講，要感謝所有肯同我一起上樓既同事/朋友。因為唔係所有人肯跟我上去。

***

講開朋友/同事，對我呢，我唔認為做同事就一定係可以做朋友，反之亦然。我亦都唔介意別人只當我是同事，不是朋友。因為我在這裡，只是為了做好組織的工作。如非必要，放工之後既時間我想留番俾自己。

近來聽到一些hearsay，是前同事對我的評價，有公亦有私。有關工作的公事慶幸屬於正面，私事呢，他們好像很喜歡拿我的感情生活來開玩笑。雖然，我覺得冇需要同佢地交代我既私事。有些事情從未有發生過，卻傳到好似已經發生了一樣，好似我對所有年青一點的同事都很有意思。看來這些hearsay已經流傳甚廣，而且很多人都信以為真。人家相信流言，一定是我的印象不夠可靠吧。這點是需要反省留意的。

如何處理？面對流言蜚語，易招怨尤的年頭，只得沉著氣吧。

閒話家常(080114)

總得給自己一個理由。是甚麼令我繼續堅持下去。

基本上，呢份工要全天候24小時stand-by。適逢多節目時(好似呢三個星期)就星期六日無休。一般黎講，當大眾都放假時，就係我地最需要工作既日子。和家人共處的時間不多，我已經好耐冇係星期日返屋企食飯，冇同媽子一起睇碟啦。

慶幸心中仲有一團火，對明天仍有一星點盼望，而且仲係「相對自由身」。

每份工作，總有當中的苦與樂。通常，對我黎謂都是先苦後樂；先是在極度忙碌、極大壓力之下，糊里糊塗把事情攪掂，之後就高高興興的學馬總統候選人話「開心一個晚上」，跟著第二日又重頭黎一次。好好彩，身邊的同事、朋友都非常幫得手，唔係佢地，我唔認為我一個人攪得掂。我希望係一個懂得點同同事合作既好上司。

昨晚，在回家途中，我是開心的。

更妙的是，今早可以放半天假。而下午，在雪廠街的某一個角落，有盒鏞記的叉燒飯等緊我。

夠架啦，已經好開心架啦。

合作

或者仲未長時間咁開會法。昨日由三時開始就開會到九點半，今日就用左五個鐘黎開會，兩日共開左五個會。

其中一個會同政府某部門開。因一些原因，要同機構內四個負責不同環頭既部門開會，當中有一個大原則傾唔到，係因為其中一個環頭唔批准，因此就算另外三個環頭同意我地既要求都不可以say yes，就此綑綁在一起。

而今晚開既會，見到幾位刻意栽培既年青人負責既部份都表現得唔錯，完全達到我既要求，即刻有d「老懷安慰」，佢地有心又夠醒目又肯主動幫忙，睇黎我都要用d方法令佢地可以繼續幫個組織手。

想謂下新黎做admin既同事，雖然初時佢完全唔明個組織既人同事，對呢個圈完全沒有認識，但佢好肯學，又好勤力，任勞任怨，做野又爽手，令組織既人都對佢讚不絕口。因為佢，就顯得某些做得耐d既同事既不濟，唔知係唔係因為咁，呢位舊同事對新同事顯得好唔合作。難怪既，如果你問我，而家我有任何事，我都會交俾新同事做，因為佢真係跟得好足。呢個post換過兩個人，新同事既表現比之前既兩位有過之而無不及。

而家係三位同事既上司，我希望我會係一個好既上司，懂得發揮各同事既長處，而又令佢地係工作上有滿足感，同時獎罰分明。尤其admin既新同事，佢既probation就黎完，我一定會同佢fight多d人工番黎，因為我而家身任兩職，仲係佢半個上司，係時候發揮下我既影響力。始終，有好既合作伙伴，一要用方法留佢地既。

其實，我都好滿意而家既班底。而因為我調職而騰出的職位要下個星期先in人，而呢個係一個怎樣的人，將對整個運作有極大影響！

慶幸

慶幸生於這個時空。既然要玩鋪勁，我們就來個玩鋪勁，投入所有精神腦力同你玩。還未有空去睇戊子年個盤，不過，不用看都知道，一定又是動盪奔忙的一年吧。

慶幸生於這個時空。可以認識這一班人，雖然關係常有離合聚散，不過人生不就是這樣嗎？

慶幸生於這個時空。豐富我未來的回憶，但願暮時不悔有過這樣的人生。我不要庸碌的過一生呢。

消費心態

元旦日忙裡偷閒，網海拾遺，貼上幾段老曹的文章。

4-12-2007

社會上分兩種人：一、賺錢目的係為左消費，80％普通人既行為。二、賺錢跟花錢係兩回事。賺錢過程中已帶來開心，賺錢目的唔係為花錢而係為賺更多錢。所以佢會不停咁工作、不停咁投資，目的只係賺更多錢，因為係賺錢過程中已為佢帶來快樂；社會上20％人口擁有上述性格。呢類人如果有足夠運氣，加上眼光同分析能力，逐漸成為小富甚至大富。但財富既多寡完全唔影響佢既消費行為，佢既消費方面依然故我；反之，賺既錢後亂花錢者只係80％普通人，佢既樂趣在於花錢唔係賺錢，一旦運氣離佢而去，好容易變回普通人；只有將賺錢同花錢分開既人，呢類人既財富才不斷累積，因為佢既樂趣來自賺錢而非花錢。佢會把工作放係第一位（因為工作帶來樂趣）而非消費。你屬於邊類人？寓工作於娛樂抑或賺錢目的為左花錢？

***
7-12-2007

至於貧富兩極化，此乃經濟環球化下副產品，政府能夠做既事唔多，而且唔見成效（董白眉領導時代扶貧政策結果卻係愈扶愈貧）。鬼佬講「God helps those who help themself!」中國人認為「天行健、君子以自強不息；地勢坤、君子以厚德載物」，即大自然力量係優勝劣汰，要不就被淘汰，只有發憤圖強；大地孕育萬物，厚實而和順才能兼容萬物。做人亦一樣，在逆境時應自強不息，發憤圖強；在順境之時，必須有容人之量及常懷助人之心，才能厚德載物。再簡單點說，下層社會必須發奮圖強、天助人助。上層社會必需一如大地，厚德載物，幫助社會上不幸人並富同情心。貧窮應戒憤世嫉俗，動不動便輕生，富人請戒浮誇，勿炫耀個人財富。

***

27-12-2007

高級領導人才係出現來自社會既包容，例如容許「不同」（difference）、對藝術既欣賞、對科學既尊敬、對文學既認同、對異見者既包容……。只有如此，社會才會出現創新科技、創新管理技巧……。中國社會一向冇容人之量，反而忌才心態到處可見。別人較自己好，中國人唔係羨慕而係嫉妒。所謂槍打出頭鳥，憎人富貴厭人窮，有才華者唔係被欣賞及栽培，而係受到嫉妒與迫害，係佢未「出頭」之前已wear out！漢唐後中國社會就缺乏包容心態，加上人與人之間互相猜忌，係中國經濟不前既最大理由。

***

至於我呢，前年定下目標，由三萬元開始，目標要在7年內儲到人生第一個一百萬。08年是第三個年頭，仍需繼續努力。