小記

因為醫療保險就黎到期，上司叫我出去搵幾個報價。我好樂意咁做，因為現有個agent都幾犯眾憎，佢試過叫我既同事唔好claim錢，而且態度又唔friendly，又迫我地同佢買保險！

佢個份續約既保價差唔多要件$22,000一位，我出去quote過六間，有五個都平過佢，最平個間都係$19,000一位！最後佢知道我地唔會同佢續約，佢就上黎死「lure」，我上司真係善良，仲肯去見佢。我都有份同佢開會，不過我好快就turn off左，因為佢講既野好唔專業，態度又差，又串，又不停話其他公司冇佢個間咁好。最後佢問我地因唔係因為人地平而唔揀佢，我上司好體面咁講話係其他公司既offer好competitive，員工有較多保障。

其實，就算你夠人平，我都唔會揀你，因為你個service好唔掂！有得揀，我地至係老闆。

上司要同老闆們解釋點解唔續約，send左個email問同事對現有保單既意見。我見其他同事冇咩反應，即係同佢地講如果你地唔出聲，我地就要用番舊個個，大家要發表意見！今次難得同仇敵愾，呢個agent自然冇得留低，就好似我其中一個同事話：「一於收佢皮！」

有時會問，點解去年我地會揀左一個咁差既agent，而且份保單又唔平，原來佢係我前上公既ex，所以份保險就搵佢做。而家多左接觸內部行政工作，就愈發現我既前上司幾咁唔稱職。

***

上午，樓下HSBC個何生打黎，話可能改唔到下個月既月供銀碼，即係話我下個月會供$15,000元落941。

***

下午同阿kate食飯，順便帶左佢買林心遲本書。佢黎緊會同男朋友去日本玩，真係令人羨慕。

***

今晚番學，星期五晚返1830至2230，我今日2100之後就已經咩都聽唔入耳了，做左一個冇靈魂既學生。

父母

好多人都會將八達通自動增值，我當然都唔例外。尋日，搵埋阿爸阿媽張八達通，幫佢地申請埋呢個服務。其實個一百幾十唔算係咩數目，只不過希望係生活既小事上可以表達到少少既心意。

從小到大，同家人既相處都非常唔理想，可能同上一代有代溝，同佢地既睇法有好多時候都唔相同，有時仲會因為咁而好勞氣。

一直都有打算搬出去住，擁有自己的空間，奈何咁樣會令財務捉襟見肘，所以更加要努力儲蓄。

自去年九月十二日開始月供以來，整個投資組合連埋已實現利潤共有33%升幅，一早已超過今年初定立的預期增幅及預期組合總值。

中移動(941)由八月十七日的入貨價$76.4上升到尋日收市既$102.1，兩星期既升幅有35%，差5%就到達我預計的07年合理價，就算而家有足夠現金都不會加碼了，只維持月供既習慣。

投資的質素是十分關鍵，集中三、兩隻「千里馬」，好好監察佢地既業績及營商環境，比同時持有十幾隻股票更有效管理好你既財富。

***

唔知幾時可以行開下呢？

真係唔好意思

首先要同各位講聲唔好意思，因為而家黎呢個blog要先login。希望儘速可以處理完一d問題，令大家可以好似以前咁自由出入。

***

上個月收到稅單，計一計，如果我唔係同父母同住，又冇供養父母，咁我要交多十倍既稅，既係差唔多一個月既人工。

近日有高層講同我講，知道呢幾排舊有既同事都係呢一年黎都好辛苦，所以黎緊「應該」有人工加，有得加當然係好事，不過去年加人工時我都講過，係呢度，一日未收到加左人工既薪水，一日都可以有變數。如果有得加，都會蓄起佢囉。

***

近排好多新同事番工，其中一個係幫我既。雖然我形住佢唔會做得耐，不過我都好俾心機教佢，其他口痕既同事見到，就好無知咁以為我對佢有意思，仲周圍同人講，仲要製造下機會俾我咁。我一直都避免係辦公室同其他同事發展呢一種關係，咁做會好影響工作情緒。

***

話咁快，八月又就快埋尾。呢個月，要負責既工作愈來愈多，我知道上司係刻意俾多機會等我去發揮，不過實在太多野了，星期四晚三點幾做完野後第二朝八點幾番到去，工作既時間多左，讀書既時間一定因應減少，呢個星期一定要追番個進度了。

生活上好多野要取捨，工作、讀書係首要集中精神處理既事，至於我好有興趣既「數」，就要放低一下，過幾年有時間再學番了。

同學

星期日，上十點既堂，九點就去舊can享受一個簡單又豐富既早餐，火腿蛋加一杯熱朱古力，都係講緊十一蚊。

九點半，去到課室門口，已經有幾個同學到左，九點四十五分，距離課堂開始既時間仲有十五分鐘，已經有三十人係度等開門。我唔知呢班同學聰唔聰明，不過我係讀undergrad個三年，都未試過上堂前十五分鐘已經有30-40%要上堂既人楝左係門口度，可見佢地係幾咁勤力，幾咁認真。

而我呢......

***

你好嗎？

今個暑假過得開心嗎？應該去過旅行吧？應該開始上班了吧，有睡過頭嗎？同事對你好嗎？沒有暑期工的不快經歷吧？應該七點就可以放工了吧？有在附近shopping嗎？有儲蓄的計劃了嗎？

.....你已經不是當時的你了吧，我也不是那時候的我了，一切都彷似那麼遙遠虛無，書枱上信封內的悄悄話，真實得一切好像沒有存在過一樣，錢包，仍然覺得沒必要都沒打算要換過另一個。如果不看日歷，都記不起那個月的事，可是那一年，卻無可奈何的跟歲月一樣深刻。

豆腐渣價錢

當中移動(941)既股價低過80元，就是「豆腐渣價錢，燒鵝脾味道」。尋日係下午開市既15分鐘左右，市場出現大量賣盤，恆指見19600點，941、2628、5股價狂瀉，最底分別見過$75、$25、$131元，超級抵買！我非常幸運，以勁抵價$76.4買多一手941，而家我總共有兩手中移動了。呢兩個星期，我用左7萬銀去入市，已經再沒有多餘的現金，不過仍然唔打算減少下個月既月供金額。 到今日，我仍然記得零五年年初銀行戶口剩番千幾蚊時既徬徨，但係都要到去年八月先痛定思痛，開始認真處理財務，唔會再令上述事件發生。

中移動既合理價絕對值$100，根據上星期公佈的半年業績，保守預計07年有25%增長(G)，PE/G=1，PE=G=25。上半年每股賺1.91元，預計全年每股賺4蚊，P=25xE=25x4=100，所以係年底前，只要佢一日未見100元，我都會繼續收集，愈跌愈加碼。

股價上落並不可怕，可怕的是群眾情緒。Beyond greed and fear，只有了解價值投資，才能無視與公司業績無關的因素(例如群眾的愁雲慘霧)，為你在股海領航。我好感激可以係林心遲既書入面學到呢d智識。

***

尋晚上堂，只不過係遲到5分鐘，都已經冇得坐頭幾行，迫住要坐尾二個行，令我好唔習慣。今日決定早30分鐘到課室搵個前d既位坐。上課既時候，只掛住聽書，同學之中有冇靚女，我完全冇留意。

***

Office經過一輪大執位之後，當初成立時既幾位職員，只剩番我一個。真正要做好一份工好容易，最煩惱既只有當中既人事。沉著氣，多做事，仍然係我工作既原則。努力工作，專心讀書，儲蓄投資，生活都一樣寫意，永遠相信雨天之後必見晴天！

一次特別操作

見個市跌得咁勁，係時候收集優質股了，不幸我既資金實在太少，只勉強夠買一手中國人壽。

而家共有2,167股中國人壽，平均價上升到$27.625，今日收報$28.6，比昨日收市跌4.6%。

今年既帳面利潤由17%急降至3%，不過我唔需要賣出我既三角組合(5, 941, 2628)，亦睇唔到驚惶失措既理由。下個月，決定用埋最後一筆資金，$10,000供中移動，$5,000供中國人壽，愈跌愈買。每月繼續傾全力用$10,000元月供股票，直至恆指上番23,000點。

中移動今日公佈中期業績，每股派$0.922中期息，增長25.7%，預期07年每股賺4元，現價80元，預期07年PE: 80/4=20, PE/G = 20/25.7% = 0.8<1，是買入的信號！

中移動派息依然慷慨，業務增長強勁，你我依然樂意繼續做佢既股東。

當資產減少時.....

實在太多野做了，八號風球既下午仲留係Office做野。因為要留意打風既最新消息，所以係度聽電視。下午既時間，電視播緊股市評論。今日又係跌市，如果星期一既十一點前仍然係趺市，我就可以透過月供買到低過30元的2628。電視既財經評論員，話如果星期一繼續跌市，就建議投資者考慮止蝕，賣出股票。

想起一句說話：「別人貪心時你要恐懼，別人恐懼時你要貪心。」呢幾日既跌市，令我今年既帳面利潤減少左30%，不過我從來唔考慮止蝕，手上既千里馬一股都不會沽，反而係呢個時候考慮加碼，增加千里馬既份量。既然美國既次按問題仲會困擾歐美既股市一排，港股應該繼續調整，所以係今日，三號風球既上午，我決定除左每月用5,000元供中國人壽外，下個月起另外將5,000元月供中移動。

預計今年年尾，我手持既現金將會只佔總資產值既5%，不過我一d都唔憂慮，因為買好公司既股票，無論個市跌幾多，你都可以繼續安心持有。

再見

一間保險公司，如果佢既保單數目得個位數增長，純利增長只係靠投資收益的話，就算間公司既管理層好負責任咁用好多資金去回購股票，減少流通既股票數量，令每股純利提升，都冇辦法掩蓋增長放緩既警鐘。

宏利(945)剛公佈業績，報紙既報導話佢既純利增長有15%，創新高，你如果只看報紙就以為佢好掂啦。但係你走去睇佢既半年業績報告，公佈既數字只會令人擔心。保單數量除左亞洲及日本有輕微增長外，其餘都地區都冇咩變化，而呢個情況已經係去年開始出現。我由去年10月起持有宏利，股價增長有20-25%，令人滿意，但係佢出現疲態了，我會等個市調整完就賣出945，透過月供將資金轉去941同2628呢兩隻千里馬身上。

月供優質股票同炒賣係一個龜兔賽跑既遊戲，最後一定係烏龜勝出。

Why here?

點解我會成日係度講投資呢？原因不外乎幾個：

1) 因為跌市，個人好興奮，所以有野想講；
2) 鼓勵更多人可以認真處理財務，而儲蓄只係一個起步；
3) 親力親為，證明我相信方法係Work既(唔需要圖表分析，唔需要分散投資，唔需要止蝕，唔需要幫襯基金經理，Financial Planner，唔駛理價位，只需要重點出擊，長期持有，每月供款，持之以恆)；
4) 因為大家都唔知我係邊個，我可以暢所欲言；
5) 希望大家唔好好似我咁，快三十歲都冇個錢。

地鐵很嘈！

通常呢，我返工就會搭地鐵，放工一般都會搭巴士，唔知從幾時開始，發覺係地鐵車廂好難講電話，因為地鐵愈來愈多雜音，有關門時的do do 聲，有好響亮既車廂廣播，用三種語言提醒你唔好食野，或者因為咁，係地鐵講電話既人都特別大聲。我地入Lift既時候，怕收唔到signal而要收線，我地一般會同人講：「要入lift啦，唔同你講啦，搭完lift再call番你！」 第日再有人係我搭地鐵時打俾我，我會講：「要入地鐵啦，唔同你講啦，搭完地鐵再call番你！」

***

而家既瘦身廣告真係佔據左地鐵大部份既燈箱，單單由奧運站經香港站去灣仔已經見到十幾個胃蘭既廣告(灣仔其中一個出口都已經有六個！)，而且仲成日更新。新個個廣告係佢背脊有對翼，打側個人既。明明胃蘭個人都唔高，係廣告度佢對腳卻明顯地(人工地)長左好多，seeing is not believing，世界太多唔真實既野啦。

***

我好enjoy番學，為左專心聽書，通常我會坐第一、二行側邊既位置。不過坐太前，個lecturer就會問你問題，早幾日，阿乜sir行近我，問我做邊行，佢當然唔係有興趣知我做咩，只不過攞黎舉例子，我想了半秒，答佢：「I am a social worker!」

講於之後，自己都唔信！

***

早前有朋友準備入大學，要揀科，佢本來想報政政，問我意見。我見佢對政治有興趣，因此極力勸佢揀歷史。因為對政治有興趣而去讀政政，通常讀完出黎都唔會做番呢行，反而如果有意從政，法律同歷史都係從政既基礎班。

個朋友仔最後揀左中大歷史系，仲話參加左投資學會tim！

咁細個就咁識諗，真係好替佢高興！

***

投資理財已經日趨普及，我認為而家二十幾歲剛剛出黎做事既人要好好打理自己既財富。選MPF，一定要揀增長型基金，仲要揀只係包含股票既基金，千祈唔好包含丁點債券！仲有，千萬不可選保本基金，因為佢地通常跑輸通脹，令你得不償失，保本變蝕本！

當然，千萬別靠MPF黎養老，最好既方法，係建立個人退休基金，又或者叫「財務自由基金」！月供股票(monthly stock investment)係一個最簡單既方法！005(匯控)、941(中移動)、2628(中國人壽)、3968(招商銀行)任選一隻，每月最少供3,000-5,000元！由二十五開始蓄，四十年之後，你六十五歲了，你會有幾多錢呢？只要你持之以恆，每月不理股價波幅而定期月供，又將收到既股息再買股票，令你既錢幫你搵錢，呢個就係人稱世界第八大奇蹟 「複利」 既威力！(詳情可以參閱林心遲既兩本著作)

我真心希望我既朋友可以個個都早日達到財務自由！

月供詳情(中銀的手續費較平，HSBC既網上理財最出色)：
匯豐銀行：
http://www.hsbc.com.hk/1/2/hk/investments/stocks/smip
中銀：
http://www.bochk.com/web/common/wide_multi_section.xml?section=investment&level_2=securities&fldr_id=236