十月份成功控制開支！

十月份的個人開支上限(當中包括交通、飲食、娛樂，但不包括上網和手提電話通話費)訂為2,000大元，經過一個月的克儉，今個月開支為1,880元，成功控制開支。

而家我將每日的開支都紀錄在spreadsheet上，此舉能有效掌握實際開支和預計開支，方法非常相似當年做QS用既Cost control同expenditure estimate，不過而家管理個人財務就一定遠比管一個建築項目簡單，原來當日學既野係冇白費到，而家就真係大派用場。

尋日行左去信和睇下有咩碟，見到王力宏既《蓋世英雄演唱會》DVD，醒起有個朋友推介話好聽，計計數，今個月仲有二百幾蚊剩，於是就用左109元購入，當係獎勵下自己啦！呢個道理好簡單，做得好就要獎勵先會有恆心做下去。

今日我同朋友傾開開支控制呢樣野，我就send左我用緊既spreadsheet俾佢參考，希望佢都可以努力啦。以此為記。

展望十一月份未有額外開支，DVDR Player 同 CD Player都係暫時得個想字，預計最遲明年中會當係生日禮物送俾自己。

還在看嗎？

朋友，你每天都仍會經過他的家嗎？

嚷著要轉工都有數年了，你仍然是在最初的地方上班。每天如是。晚上下班時，你坐的巴士會駛過他的家吧，是舊式的唐樓，從巴士窗口望出去，大概看得到那個地方開了燈沒有，那個曾經是你逗留過的地方，那個曾經載住了那幾年的時光，亦曾經載住了你的愉快、憧憬、徬徨、期待、抑鬱、眼淚和心碎。

你每天都猜，他在嗎？如果在，和誰在一起？他不在嗎？如果不在，跟誰在外面一起啦？其實你打從心底裡明白，不管他在家不在家，燈有沒有關，那一切都和你不相干。你令我想起另一位朋友，他有時候會坐記程車到之前工作的地方，而途中都一定經過她的家，他會像你一樣，從車廂裡探頭看，雖然他知道他甚麼都不會看到，而且，真是在路上看見她，都不一定是愉快的經驗，但是，他還是每一次都會探頭看。

兩位朋友的故事，卻在同一歲月的路軌上行走。仍在望嗎？還在看嗎？

那一星前塵往事，伴隨粉紅色的記憶，早就該埋在那褪色的記憶回收筒。

獎勵

蔡琴 機遇 XRCD

呢幾晚，都聽住佢黎睇書，結果係睇睇下就唔願行開，由坐嚮梳化上轉為訓嚮梳化上，掩捲入睡。到凌晨四、五點先起身熄機......

呢隻碟令我好有衝動買一部純CDPlayer，Cambridge Audio 640C v.2?還是NADC521bee，Arcam Cd73......

都係得個想字罷了。

失眠

訓唔著，起身寫下野。

舊日記

而家都好少寫野嚮個度，係間唔中貼下相片上去。就算第日唔再用，我都唔會Shut down佢，始終佢都紀錄左一段經歷，交織成一段回憶，而且好多朋友都留過言，都算係一種集體創作。

依然相信

你依然相信嗎？

童話裡的公主王子，歷盡萬難，以後就快快樂樂的生活。

曾經相信，「以後快快樂樂的生活」就是一切的結局。年歲漸長，我們都知道，歷盡萬難之後，不一定有愉快的生活。兩個人走在一起之後，不一定會幸福。

你在情路上受過傷嗎？傷口仍隱隱作痛嗎？失過戀嗎？被人拋棄過嗎？有狠狠的傷過別人嗎？

你們試過。我亦試過。

但是你會放棄戀愛嗎？

不會放棄戀愛，只要雙方心存諒解，包容和忍耐。

未有另一半，你要好好的享受單身生活；有，你要好好珍惜，用心和另一半好好相處，而且，要知足。

你曾經在情路上跌過嗎？我試過的。

但我依然相信。不會畏懼。

找到合適的另一半應該是.....

憂傷會分半，快樂會加倍。

記於參加完朋友的迪士尼婚宴之後。

MPF

打從第一份工開始，選MPF都一定會選保本基金。而家對投資的看法已變，一定不再選保本。

二十七歲，係最適宜用最進取既方法投資，年青就是本錢，只要每個月好好控制開支，把握時間，好為未來播種，三十年之後，就係我既收成期。

見習生

辦公室多了兩位見習生，都是大學三年級生，他們一星期來實習兩天，每次四小時。

替他們安排工作是一個煩惱。每次來到，我都只會安排一些瑣碎的工作給他們，例如：on-line daily newspaper clippings，影印，打電話等工作。聽落我都覺得我浪費緊佢地既青春。

現時我們主要負責行政同campaign，加上佢地見習時間所限而又不能更改，實在好難安排工作，如果我們有研究部，相信見習生的作用會大一點。

好久不見

昨日與好幾位大學時的「莊」友聚舊。

畢業都有四年了，聚首愈來愈困難，原因都係各有各既工作，各有各既拖友。我好享受呢一類三五知己既聚會，而我亦唔介意去安排，但係份工成日都有突發事，加上星期六、日都要工作，所以我而家都儘量避免做攪手。可惜尋晚大家唔可以留太夜，十一點幾就走人。

有時會諗，如果第日有能力搬出去住，我一定會選一個客廳較寬敞既地方，咁朋友上黎坐都坐得舒適d。

人事

辦公室既人事令人沮喪，再係咁下去，紙包唔住火，終有一天會出事。我唯一可以做既，就係繼續努力工作。

收到消息，我同另一位同事將會有人工加，如果真係加，我既加幅會係較高(因為我而家低人工過另一位同事，加完之後我地會係同一水平)，是否落實就要下星期先知了。

(後記，今日有人通知我加人工一事已經作實。唔，買隻碟獎勵下自己先。)

你會抽工行嗎？

「唔會。」

原因有：

一) 冇現金；
二) 就算有現金，都會選擇加碼買005；
三) 就算有現金而又想買中國銀行股，我會買3328；
四) 今日坐叮叮時聽到好幾位婆婆同師奶都講緊買工行，當人人都話要買既時候，你會唔會買呢？

工作夥伴

我需要運貨call車時，總係會來來去去call個一兩個司機，因為佢地好交帶、有手尾、唔錫身。我喜歡這樣的工作夥伴，因為佢地永遠俾到我信心。而且，當人地收緊500時，佢地收350。

相反，我今日拜託左同事做d事，結果佢就冇左件事，我愈來愈覺得，與其交底俾佢地做，不如自己做左去好過。

出左黎做野幾年，值得我尊敬既人，就係我畢業後第一份工的直系上司Tiffany，佢對工作既態度、細心謹慎同對工作既「執著」到今日仲影響緊我。

「正」字

三色台有個新節目講「正」字，收睇左第一集，覺得好有教育意義，我們寫錯字，就係因為對個字或詞唔認識，只要明白左個意思，寫錯字既機會就會減少。家中有幾本講錯別字既書，間唔中都會睇下，溫故知新，十分過癮。

你不知道你們幾荒謬 - 直至你站在這裡

尋晚個會好勞氣，明眼人一早都睇得出咩事，當事人自說自話，繼續佢既無理要求。先解釋一下，無理即是當全世界都為左聽日都event都忙到死，但係你就成日講如果你當日冇一張：-

1) 可以調高調低，

2) 可以有look，

3) 冇手柄，

既?，你就彈唔到琴。

Make sense?

於是其他與會者都發炮攻擊，不過，竟然有人提議攪手去度下張?幾高！由於大家都俾我brief過，熱哂身，即刻有人反擊，「唔通有個人咁高咩！」最後有與會者話去自己office搬過去。

當然，會後不少人都同我呻左兩句。

佢老婆好明白事理，今早打俾我，話已經教訓左佢老公，d野佢會自己攪掂。

區區好明白，當個個都自我本位時，係好難去合作，於是我一早就唔做今次單野既主力，俾左其他好多意見既朋友去做。佢地經常投訴職員滿足唔到佢地既要求，而家，你都明白職員的難處吧？

945

有人還了錢，夠錢買入一手945，而家戶口既現金係我成副身家既3-4%，依然每天上班，帶飯盒，努力工作，生活不變。

不要打破雞蛋！

故人既留言篇篇都好唔客氣，不過我都好多謝你咁賞面光臨。關於聽歌，我就係襯隔離屋搬走左先開機聽，而且，我都唔敢聽太嘈既歌，都係聽早期既王菲同埋Jazz，非常的柔和清脆悅耳。

今日中午睇左945個股價，竟然係247.40一股，成交量三十幾萬。不幸手頭上唔夠現金，執唔到平貨。尋晚睇書，原來嚮股價下趺時入市係屬於高風險活動，真係唔講唔知！

我既目標係嚮二○一三年之前用儲蓄投資去賺取第一個一百萬，而家一定要好好保護手頭上脆弱既雞蛋。我認為最合適既方法係將大部份資金買005保本賺息，小部份買3328做衝鋒馬車，如果入埋945就更加理想，另外不要放棄發掘投資既機會。今日既投資，係為十年、二十年、三十年之後做打算！

二○○八有國際Event，諗諗佢先。

對不起，我鬥志高昂！

可能係太多工作，所以呢幾日做野都高度集中，唔知係咪咁，所以木口木面，冇甚表情。同事今日放完假番黎，仲係懶懶散散，同另一個同事講我地個team士氣好低落，大家都冇心機做野。之後我企左佢個位前面收Fax，佢可能見我冇咩表情，就問我做咩木口木面，係咪冇心機做野。我除左心裡講左一句「下，對不起，我鬥志高昂！」，就同佢講，我今日好好，不過好多野做，要做快d，之後我番埋位，繼續我既工作。團隊既士氣，係要由隊長去提升，而我既隊長，面對住呢位同事，就真係過份縱容。同事之間絕對唔應該發展男女關係，一旦有左呢個關係又而唔恰當咁劃清界線，就會出現我而家身處嚮呢個office既問題。

令人嘔心既係，男的有女朋友，女的亦都有男朋友。

話就到此為止，本周活動多多，根本就係大把野做，根本就唔應該放假，好可能我既同事大部份都好年青，而且office既工作氣氛唔強，做野未必咁上心，所以如果同事欠缺自制能力，就好容易是是但但過一日。另外又有同事，好喜歡嚮老細面前表現自己好似好勤力同好似好上進咁，當老細一行開，就事事縮骨，有事就扮睇唔到。

未回應

阿黃，好想回番你，不過今日講左office的事，等我遲d再覆你啦。多謝你咁正既回應！

今日做野好快手，愈做愈覺得d野愈上手，開始覺得有空間去再做好d，做快d，接近凌晨十二點，依然鬥志高昂！

等待945，還是加碼供005？

究竟購入宏利保險(945, 股價252.00)好定係加碼供005好？不過無論點，做埋呢個決定，今年就唔會再有新既投資行為。好多人都覺得945好貴(約252一股，25,200一手)，其實貴同平，都係相對既價格，而股票，係講價值，估計呢間人壽保險公司未來數年既盈利為15%，極具增長潛力，因此絕對買得過！

又，005今年既股價只比去年增長左13%，屬於落後大市，星期五收市報約146，市盈率都係偏低既13%，一手匯控要成五萬幾銀，雖然係「貴」，但佢既價值仲未完全反映嚮個股價上，所以就算而家購入，都屬於「抵買」，如果你有足夠金錢，我會建議你明天開市買005，如果好似我咁冇錢，可以月供。

手頭上除了之前學人抽新股而得番黎既中國銀行(3988)，其他股票(005, 3328)都係優質股，值得長期持有。不過又諗番轉頭，如果唔係優質股，當初買入黎做咩？

做散戶既好處，就係可以按照自己的信念去投資。

心理質素

而家好多股票既股價都節節上升，好多人都賺左唔少，恆指都望緊18,000點。雖然我初入股海，但係我好明白股票市場好似世事一樣，有盛有衰有週期。如果明天股票市場大趺，我會恐懼嗎？我會因為股價大瀉而沽貨嗎？我會因為咁而訓唔著覺嗎？我可以肯定的答：「不會」。只要005，3328(甚至即將持有的945)的市場價值、管理層、業務方向等基本結構不變，我係不會沽貨。當市場大跌，人人都恐慌地拋售時，呢d係心理因素影響股票市場，同間公司既業務無關，只要清晰明白同埋記緊呢一點，每一個散戶(如你如我)都可以克服呢個心理挑戰！

生活基本保障

講到尾，儲蓄投資的目的，就是保障未來生活，生活既意義，係由人一手去創造，自問區區是一個幾不務正業，幾冇長遠計劃既人，但係心中有一團火，而呢團火有生活保障既Backup，將會繼續義無反顧的燃燒下去。

雖然我嚮呢度成日講投資，其實投資只不過係人生既一部份，我既生活唔會受投資的成績而影響，反而，事業同家庭先係人生既重點。

不要惹我

呢期既工作量逐漸提高， 注意力因此需要高度集中，通常嚮呢d時候，同事冇甚要事就不要打擾我。我非常清楚要負責的工作範圍同埋自己的能力，因此從不假手於人，that's why I am paid for it! 同樣，其他同事要做既事，如非必要，就唔好煩我。好老實又現實而且不客氣地說，自己的事未完成就去做人家的事，上面問責時就只會怪你。所以有同事話我唔幫人，我完全唔介意，因為我真係未完成手頭上的工作，同埋，你有時間埋怨我，不如你實際d想下自己點解攪唔掂先。

今日上司Forward左個Email我，裡面有六大工作要做，叫我跟。佢上星期已經收到個mail，當時已經係urgent，一星期後先俾我你話係咪好過份！我上星期見佢冇任何吩咐，就專登問下駛唔駛我跟，當時佢話唔駛，點知今日先叫我跟，都係個句，我絕對唔可以令自己身陷險境，即時完成左佢！

又，我有一個幾唔好既地方，就係對同事要求太高！

又又，可能我太認真了，不過，我當呢份工係我既事業。事業喎。

娛樂

而家開始十點幾先放工，返到屋企既最大消遣係：聽歌。

用部AMP番聽九四年出版的王菲國語碟《天空》差唔多係每晚的指定動作，愈聽就愈覺得部AMP和二手喇叭真係物超所值。

好懷念王菲，自從《容易受傷的女人》開始就喜歡佢了。無論工作上幾勞累，聽下佢既歌就可以消除疲勞。曾經錯過了佢第一張國語專輯《我願意》，而家想搵番都幾難矣！

回應

回應「好朋友」，你說得對，錢不會從天掉下來，所以我未來的資本是由今天開始一點一點的累積。 而我選擇的方式，是儲蓄投資，即是每個月將儲起的資金供股票。而我的投資方法真是簡單得不能再簡單，就是Buy and Hold，如果投資的公司基本結構不變，要賣出的日子好可能係幾十年之後的事，就算股市大瀉，我都唔會賣出，生活繼續，安心的繼續月供股票。

到六十五歲時，就算好Humble咁平均每年有10%的回報，今日的一點一滴到個陣已經係另一個光景。到時我(和內子，如果結婚的話)不用為生計而營役，生活和醫療開支都有所依靠。(MPF? Forget it!) 如果他日膝下有兒女，年紀老邁的我，都不會成為他們經濟上的負擔。這是我在經濟方面對家庭的最基本承擔，亦是我開始儲蓄投資的主要原因。只要持之以恆，每月供款，明年還清債項之後提高供款額，仲有我以後的薪水不低於現時水平，六十五歲有六千幾萬係絕對唔出奇(如果好運少少，係可以去到一億五千萬)。

題外話，股票市場充滿魔鬼的誘惑。原本打算用5.2入3328，結果5.49入左，比心目中的價錢多付580元。截止星期五，3328的P/E是26.29。

上了一課投資心理學。都係個句，犯錯要襯早。

又，另一個心理因素，就是如何克制購買慾。上個月既個人總開支連交通費(不包括寬頻費、電話費)係HK$2,657。

社民連成立

昨晚行經旺角，見到LSD攪個成立演唱會，人人都穿紅衫，唔知發生咩事者以為係倒扁。睇左一陣，佢地嚮場地、紀念品、同個Show好有心思。LSD係「旗幟鮮明的反對派」同埋有好強的基層形象，單係呢樣野已經好吸引社運中人，所以，LSD的組織力相信係非常之高。YM同其他LSD既執委狂插「供聞擋」參加小圈子選舉，見到人海中有「供聞擋」的鄭教授同社福界的張鬍鬚，佢地俾面出席，又要俾人插，真係難為左佢地囉。