冇聲

尋晚播'The Devils Wears Prada' 時部m唔出聲，問題可能出左係三個地方：

1) m的digital input壞左
If so: 雖然有保養，但係要由櫃入面拎佢出黎係一項大工程，好費時。
Voice from heart: 買左半年就壞左？唔係呀化...

2) DVD的digital output壞左
If so: 換左佢，因為之前都想換馬。
Voice from heart: 唔，之前都想upgrade做DVD-R，不過呢個月同下個月都冇budget喎，要儲番d彈藥賺大錢。

3) Coxial線壞左
If so: 出去旺角友誠中心買過條。
Voice from heart: 我好希望係呢樣野壞左，最多用幾百蚊買番條好少少既線，無論係金錢同時間上，都比起1) 同2)慳好多好多.....

而家都唔知咩壞，決定晏d拎條cable出去試下...我中午食飯要用
部m播《大國崛起》的o麻！























後記：唔出聲既原因係第4) 唔好彩！拎左條cable去試，冇事，再返屋企試下，又居然出番聲！！！

已經睇左共十集的《大國崛起》，仲有兩集未睇，真係好有趣，好有啟發。旺角最平賣緊hk$125。(尚書房賣$158，超貴！)

***
只因喜歡........菲


















早幾日出左信和睇下方大同既碟賣緊咩價錢，發現王菲出左隻精選碟，個制式係據聞由香港人研發既LPCD45，即係用減低雜音既器材同技術生產，減低信號既失真，力求將CD既音質提升到好似黑膠碟既水平。

上星期嚮信和賣緊$15x，呢幾日就被炒到17x以上，如果市價去返15x既水平，都會考慮買入黎聽聽既。

來了！

下個月將會大出血！！！

海龍、四款胸像......同埋....三月既一輝！！！

冬天與歌

每人都有一套減壓既方法，對我而言，每日最大的娛樂，就是在晚上靜靜坐在客廳的沙發上聽歌。冬天的晚上比任何時候都要寧靜，由喇叭播放出來的歌聲更是清脆悅耳。阿菲的《天空》，百聽不厭，去年我家增添了一套音響組合之後，這張唱片已經放在客廳當眼位置，隨時候命，推介當中第八首歌曲《矜持》。最近買了貝多芬的第九，展開另一段音樂旅程。

離地

因為工作既關係，我有機會旁聽好多唔同既論壇，見到不同既人嚮論壇上表達自己既理據、立場，嚮我眼中，辯論唔係影響你既對手，而係要影響你既受眾，即係聽緊辯論既人，從而令某一個主張或是人得到更多人既支持。不過我留意到，嚮辯論既過程，好多人都會忘記左呢一個目的，而被辯論過程所帶來既「良好感覺」而沖昏左頭腦，變左為辯論而辯論，為享受「良好感覺」而辯論。

近來城中都開始講下辯論，係BT同袋Gun既辯論。袋Gun參選，係人都明知佢係唔會嬴。有記者問佢呢排忙緊咩既時候，佢就話忙緊寫信俾八百個損位，爭取佢地支持。

從媒體上得知，佢之所以參選，係要令星斗市民如我知道呢個八百人既選舉係幾咁小圈子，如果佢得到絕大多數市民既支持而嚮八百人既選舉中落敗，咁就成功反映個制度係幾咁唔民主，由此推斷，佢既主要戰場唔係爭取損位既支持，而係爭取七百萬市民既支持。而家佢個辦公室做緊街頭收集簽名，唔知個力度夠唔夠呢？

充電完畢

為左準備上星期日個單大野，早幾日就係極度忙碌。 星期六有位預科既同學結婚，一般黎講，任何人請親我去飲，我都儘可能出席，話哂都係人生大事。不過今次有考慮過唔去，因為第二朝要五點半起身，好擔心休息唔夠而應付唔到星期日既工作。掙扎左一陣，我還是選擇：去，完成工作之後就馬上趕去佢個婚宴。

當晚既婚宴好有心思，主人家拍左套短片，模擬由相識到求婚既過程，非常有趣！當新娘正式進場既時候，腦海中浮現佢中學時既模樣，記得佢個陣時坐我隔離個行後兩個位，坐佢前面個朱姓同學高佢好多(我都好耐冇搵番阿Jeffery Chu啦)，所以Miss阿sir唔容易見到佢，當日既小妮子變成今日披上婚紗既公主，一時間感觸良多。講開又講，如果我第日，一個唔好彩，萬一要結婚擺酒既話，我一定會準備五分鐘既solo，唔理唱歌又好，棟篤唔笑都好，我都想有一個五分鐘既solo。

當晚見番好多預科時期既同學，認識佢地都係差唔多十年之前了，我地交換左email、電話同msn，仲影左好多相，不過如果三日之內收唔番d相既話呢，通常就會冇左下文。今日已經係第三日了。

我腸胃唔好，去飲都係食到條魚就已經full，早前有朋友教我每日按摩胃部，於是我依佢吩咐每日起身同臨訓都會按摩個胃部九九八十一下。唔知係咪個方法真係有效，今次我竟然食埋個甜品，真係好耐都冇試過由頭食到尾啦！

返到屋企，上床時都已經係一點幾。第二朝，我比鬧鐘既響鬧時間早五分鐘醒左，當時係五點二十五分。為左適應個日既早起身，我特登由星期三開始每朝就七點十五分起身，哈哈，好彩我既心血都冇白費到。

星期日總算安排得妥妥當當，上司曾經叫我唔好沾手呢個系列既活動，不過唔知點解，就算我努力去避開呢類工作，事情最後總係會落在區區身上，既然有舞台，就要做好角色。

當日完成活動之後大圍人去食飯，響呢個咁causal既場合，上司竟然嚮我同其他同事面前講公司好快會冇錢，大家搵定工咁話，佢講完就行左去，我心諗咁即係點呢，如果係事實既話就唔該響公司度講，都唔知當佢認真定唔認真好。又試係咁啦，每當我做好一d計劃既時候，就會馬上有些突如其來、根本性既改變，今次又會係咁嗎？如果呢個係我既命運，我就只好無畏無懼地繼續利用呢d經歷去磨鍊自己。明天，我依舊準時上班，依舊努力工作。

星期一，休息一天。在家用正常音量去聽歌，順便執下野，搵番初初出黎做野時既account statement，嘩，原來個時我就係好大洗，個幾年少少錢都儲唔到。雖然唔係好耐之前既事，不過個種感覺同情懷，就好似好遠好遠了，而家只能夠好依稀咁嗅到個種咁青蔥既氣味了。

今日充電完畢，明天早睡早起，繼續有規律既生活！

平淡過日子

放工，返到屋企，沖埋涼，已經係晚上既十點半。

今晚天氣好寒冷，不過我係喜歡寒冷既天氣多過夏天。我係好怕熱。

媽子整左個爐俾我一個人打邊爐，佢就坐左係我隔離，同我一起睇E-son既演唱會DVD，「人來人往」、「防不勝防」、「1874」都係好好聽既歌。不過由於係夜晚，加上隔離屋有小朋友住，唔可以開得太大聲。

我好感激，經過一日既工作，屋企有野準備好等我番黎食，而且媽子會為我準備好明天的便當。我好感激，我有能力買左呢套音響組合，佢令我消除好多工作壓力，亦令我一家人睇dvd時可以享受好正既音效。我好感激，因為媽子仲健在，而且我工作有收入，令媽子唔駛為我擔心。

幸福唔係話你擁有幾多野，而係你有幾珍惜身邊既人或事。

***

朋友今日生日，通常我好喜歡祝生日既朋友：

A year older, Ten years wiser.

Happy Birthday!

日久見人心

身邊不乏關心區區的朋友，他們都會在工作上及其他方面給我提供不少意見。

有朋友很厲害，懂得相人，我到今天都不唔太識睇人，只係知邊d係可以交心既朋友，邊d唔係。總之都係個句：防人之心不可無。

喜怒形於色既人遠不及笑面迎人，其實背後藏著利刀既人來得險惡。

有幸經歷過一些起伏，我一定唔會忘記曾經幫過我既朋友。

很老土吧？當中的經歷可是有血有淚。

今晚天氣很冷，很喜歡這種天氣。

***

經常在這裡搗蛋既故人在男友的家中受到不少壓力，家家有本難念既經，希望你可以搵到一個立足點。我誠心祝福你。

何必Social?

上司請哂幾個Office既人去佢屋企食飯。

同事之間既每日相處時間已經有成10個鐘，放左工，我只係想見下朋友，又或者返下屋企，我真係唔係好喜愛同呢度既同事有工作以外的social。

***

嚮公司見到一個人對理想既堅持。上星期某一晚見到既個一幕，令我非常感動，嚮個人健康同理想之間排優先，有人係會選擇理想先。

***

尋日去左HKU同朋友影畢業照，影相中途居然撞番一個中學同學，大拿拿成十年冇見了！交換左卡片，冇講得閒飲茶，卻忘記了問人家msn。嚮校園行行下既時候想起鄭同學約左我幾次去影相，我都冇時間去，真係對佢唔住。Swire樓下開左個cafe，不過我最掛住既係樓上canteen既海鮮拉麵加可樂。好似中午十二點前order係會平2蚊tim。

***

蘇乞先生，再見到你既時候，依然覺得你面目可憎，個樣真係夠哂假，厚顏如斯，真係佩服佩服。

***

下午同幾個相熟既大學同學食飯，其中有兩個係外國番黎，夾份送左一包朱古力俾我，令我非常開心。食完之後嚮TST東蹓躂左一陣，彷彿回到以前。畢業之後大家都冇乜點變，除左我多左好多白頭髮。

當別人貪心時.....

有朋友正為放唔放左手頭既股票而憂心，因為佢擔心放左之後會繼續升。

我早幾日放左我既愛股3328，因為佢既P/E去到四十幾咁高既水平，呢個價同其他中字頭既銀行同保險股既股價一樣：超乎現實！佢地而家既價錢係反映緊未來三、五年既業績，股價短期係投票機器(voting machine)，中國未來既高增長前境已經令好多人投左信心一票，不過股價長遠係講份量既(weighting machine)，即係以盈利見真章！我手頭上只係得小雞蛋份量既金錢，要令佢長大，就一定要避開高風險既投資，去年賺15-25%係完全唔出奇，要記住當潮退既時候，先知道邊個係光著身子游泳。呢幾日我會放埋3988，增持現金，靜心等待「某日」既來臨。當你今日憂心賺得唔夠盡時，不如為「某日」來臨時唔夠現金而做定準備啦。

公司得一個同事知我手上有咩股票，呢個同事對住門口坐既，上星期放左3328之後，佢每日都走黎我個位度，嚮我耳邊細細聲講3328既股價升左幾多，佢話想刺激下我咁話。我知道3328既股價比我放既時候上左幾個價位，不過你決定放，就唔好介意之後佢點升，呢方面，我就唔會回頭望了。

呢幾輪報紙頭版都係講個市升左幾多幾多，連陸東都上左上期壹仔封面，唔知你又有咩啟發呢？今晚聽阿媽講，佢公司既同事而家個個都講買股票，個個都話入市就實賺，E，唔知牛頭角既順嫂買左中字頭既股票未呢？

我都係聽日就放左手上僅餘既中字股3988了。

收到未？

Out

屋企Update唔到個blog，唯有返公司先update。

一月一日晚，一定睇叱吒。除左Eson既歌同古仔既愛得太遲之外，我真係一首都唔識，嚴重地與本地流行樂壇脫節。最開心都係見到EO2，佢地嚮個圈浮沉都六、七年，終於得獎，我相信每個人都樂見佢地既付出得到別人認同既時刻。

中檔賣廣告，其中有一個樓盤廣告見到好多d所謂「堪輿大師」話個樓盤點好點好，嘩，咁都得！

***

朋友聚舊

上星期嚮唔同既場合見番好多「故人」，在大學同學的婚宴上、在中學同學的茶聚上、在另一班大學同學既聚會上，在公司的聚會上及其他。

太多人既聚會，一定會流於表面化，好多時候見完之後都唔知對方而家既生活係點樣，「圍威喂」之後就散。最理想既聚會，係三數知己(一定唔可以多)圍埋一起，談天說地。