升呢(100126)

早前說過，依據玄空理氣，公司的興旺，繫於一門。

公司而家攪緊個起碼半年的超級超級大project，實在不容有失，係時候升呢。J等了半年，一直都未有合適機會，殊不知，因為發生了一宗意想不到的意外，終於出現了一個機會。J食住個勢，膽搏膽的提出了加門的建議，並和盤托出與玄空有關的原因(因為唔想作其他理由)。又殊不知，有宗教信仰的上司聽完，竟然接受！原因是他相信J提的建議，都是為公司好的！J說要儘速進行，因為要出現效果要等一個半月(四十九天也)。

加了門之後，改了門路，整個寫字樓變得納氣深長，納正坤向的氣，依飛星是上山下水，損丁破財之局，但寫字樓是坐空朝滿，正正如曾人權住個度一樣，是「倒騎龍」格，即是山星見水，水星見山，於此例是不凶反吉。寫字樓更成三般卦，全局都是一四七、三六九、二五八的飛星，唯因為特殊的實際環境，必定是女人話事。

J而家坐的位，依現時office的門路是全寫字樓最差的，但當初J都揀呢個位坐，就是要等升呢的一天。Well, may be that's what I called 先衰後好。

















***

J的朋友有時都會叫J試試開個斗數盤玩玩，J自問學藝不精，只講基本性質，唔同人推算未來運數，因為怕推錯。

有天，J開了一位女性朋友的命盤，其人原局的夫妻宮有很大問題，師父說，有此星系的人，其男朋友/老公皆會愈做愈霉。從該女性朋友的外表，J幾肯定該盤是準的，女性朋友做事好似是是但但，得過且過，但由命盤中看到她價值觀，根本就同外表是兩個人！過多幾年，當她三十來歲，就是事業飛黃騰達、暴升的時期，於男命是絕佳的運勢，可惜是女命，當事業上升之時，大運夫妻宮見七殺，主與丈夫離婚，再看其原局夫妻宮，幾可肯定是兩嫁之命。

J於是問師父，見到呢個盤，可以點俾意見給命主？師父說：「冇意見可以俾，亦冇野可以講，總之自己要識講野。」J明白，術者不是要顯示自己有幾準有幾叻，而是說該說的話，幫可以幫的忙，有時候亦得明白，人力始終有限耶。

先知命，後樂天(100123)

呢半年工作得異常困難不順，心情不好，更新部落的次數也很少。早前有時間上師父寫字樓取資料，剛巧他又在寫字樓又有時間，於是傾了一個上午計。J學習了一年術數，但仍不時在工作上(生活)有煩惱困惑(搬左新office之後)，因此當日給師父省了一輪，說J知道自己條命的性質都唔識趨避。

茲將當日對話簡要紀錄如下，以便警惕：

人出世就好像有一張balance sheet，有credit有debit，有些人就credit多過debit，於是一生做什麼都好順利，有些人，特別是會出名的人，通常前半生一定會好辛苦。福緣薄的人更會大起大跌。師公個大仔考第一，番屋企要被師公打同鬧，因為唔想佢太早用左d credit，所以細路仔要吃下苦，留番credit等大個先用。

金威早前出事，因為福不夠厚，所以凡事不可去盡，有好事就不可去盡，但是去到衰既極點就一定會好轉。今日辛苦就是幫日後消業除障，有credit要製造更多credit，積善之家必有餘慶。

命宮入辰戌丑未，力量被困。明明要做A，但做左B做C都唔想做A。辰戌丑未是四墓位，藏，唔想揚。做人明知係咁弱點，又黎呢個想法，就要改變個心態，用「死就死啦，做左去」既態度。所有星入四墓都有這個特點，入大運都有這種性格。J天生懶散，但好彩有煞星擎羊、火星打孖入命，負負得正，因此有壓力逼J去做野，並有足夠力量衝破羅網，但過程就好似鑄劍咁辛苦。如看今天的J，誰也估不到J日後有機會闖一番大事業。

知道自己的死穴，就要接受呢個自己，進取有度。知命樂天就係咁解。

下個運是用來建立groundwork，師父一年前識J時就叫J去做慈善工作。師父說睇J今日個款就知道仲未去做，結果應哂d衰野係工作上，講左都唔聽又一例證。

因為J的命格有一個特點是消災解難，遇難呈祥，先衰後好。如果將好野放在前，衰野就之後出現。開頭順利，就之後出事。調番轉黎講，開頭麻煩就之後有好收成。因此，應該放手給下屬辦事，出亂子去執手尾就是應左個性質。開頭做damage control，開頭唔好做咁多野，冷眼旁觀，後期盡全力出動。

由於J的命宮性質，六親必有缺憾，如在男女關係有缺憾反而可以長久。感情開頭好，之後就出大件事。(想起王菲唱的一首歌的歌詞：愈美麗的東西愈不可碰...)所以，師父說J的命似死人曾人權(師父係用死人呢個形容詞黎形容佢)，要pk左先旺。到第日去到高位時不要學曾咁招積，有人鬧就要從容面對，就出現災難之後就是表現J的時候。

J如果做解厄的機構，而家就做到總監，人生好順暢，事業化到J的解厄力。J愈奔波就愈好。J做啱個個位就好happy，怨天尤人就是出左問題。

***

J說師父講的事很準很啱，師父得戚地說：「啱咩啱，發咩夢呀你，我幾時唔啱....我幾時講過我唔準，唔準今日點可以你叫我做師父呀！」

山雨欲來(100121)