究竟購入宏利保險(945, 股價252.00)好定係加碼供005好？不過無論點，做埋呢個決定，今年就唔會再有新既投資行為。好多人都覺得945好貴(約252一股，25,200一手)，其實貴同平，都係相對既價格，而股票，係講價值，估計呢間人壽保險公司未來數年既盈利為15%，極具增長潛力，因此絕對買得過！
又，005今年既股價只比去年增長左13%，屬於落後大市，星期五收市報約146，市盈率都係偏低既13%，一手匯控要成五萬幾銀，雖然係「貴」，但佢既價值仲未完全反映嚮個股價上，所以就算而家購入，都屬於「抵買」，如果你有足夠金錢，我會建議你明天開市買005，如果好似我咁冇錢，可以月供。
手頭上除了之前學人抽新股而得番黎既中國銀行(3988)，其他股票(005, 3328)都係優質股，值得長期持有。不過又諗番轉頭，如果唔係優質股，當初買入黎做咩？
做散戶既好處，就係可以按照自己的信念去投資。
心理質素
而家好多股票既股價都節節上升，好多人都賺左唔少，恆指都望緊18,000點。雖然我初入股海，但係我好明白股票市場好似世事一樣，有盛有衰有週期。如果明天股票市場大趺，我會恐懼嗎？我會因為股價大瀉而沽貨嗎？我會因為咁而訓唔著覺嗎？我可以肯定的答：「不會」。只要005，3328(甚至即將持有的945)的市場價值、管理層、業務方向等基本結構不變，我係不會沽貨。當市場大跌，人人都恐慌地拋售時，呢d係心理因素影響股票市場，同間公司既業務無關，只要清晰明白同埋記緊呢一點，每一個散戶(如你如我)都可以克服呢個心理挑戰！
生活基本保障
講到尾，儲蓄投資的目的，就是保障未來生活，生活既意義，係由人一手去創造，自問區區是一個幾不務正業，幾冇長遠計劃既人，但係心中有一團火，而呢團火有生活保障既Backup，將會繼續義無反顧的燃燒下去。
雖然我嚮呢度成日講投資，其實投資只不過係人生既一部份，我既生活唔會受投資的成績而影響，反而，事業同家庭先係人生既重點。
1 則留言:
喂，阿朋友，你近期對股票分析真係頭頭是道，其實我覺得你只要唔係只係賺錢，仲要係少本短線想賺大錢果隻（呢隻要拉去打靶﹗）同埋人買你買就已經好ok，至於點用?錢黎投資，只係一個理財技巧，因人而異，始終，理財是一種學問黎既。
但係你中間有一個pt我非常同意，其實可能好多散戶，搞黎搞去都係想?個生活保障。呢個正係問題核心。有人可能歡歡喜喜咁「離場」，拿到一定既「生活保障」，但係好可惜，股票市場其實對好多人而言只係一個「奢侈遊戲」，我諗對於好多人黎講連「入場」都未做到；就算你是其中之一幸運兒，能進場，但係由於好多股票都受大股東或者大機構投資者影響，佢地總比散戶收消息要快得多，萬一佢地突然離場，最終受害既就係散戶。所以有時就算分析有幾獨到，都會輸係股票市場，就係因為我地唔係億億聲既大股東或者機構投資者。金錢遊戲永遠都係以金錢為主角。
而我思考得最多既係，香港人要係股票市場?生活保障，應該係一種悲哀，香港一直以來都冇「生活保障」呢件事，所以我地好緊張賺錢，因為出黎做野之後就要開始負擔屋企開支，阿爸阿媽開始老，佢地一冇賺錢能力，屋企裡面其他人要開始「接手」，一路接手，我地就一路驚第日老左會好似自己阿爸阿媽咁，所以又想儲多?錢比自己，如此類推，我地一世都係度賺錢。因為冇錢就唔得。香港係一個樣樣野都講錢既地方。
「基本生活保障」係我初初出黎做野果陣NGO已經一直提呢個概念，但好可惜事至今日呢樣野從來都冇出現係香港。我相信呢個唔係咩budget問題，而係管理香港既人世界觀同理念……
發佈留言