難得好天氣

今天天氣非常晴朗，在座位上抬頭一望，IFC對出的維港景色確實令人心曠神怡，頓時忘卻銀髮日多的憂愁。

下午在寫字樓附近拐了一圈，在溫和的陽光下，街上的人都懶洋洋的，處處都是一幅一幅和諧的圖畫。

想起剛過去的星期二，那個早上的雨可真是下得夠狠，剛巧我在中上環，進退不得，卻忽然都去賣斗數書的地方看看，但就是忘了那兒是文咸東街還是文咸西街。結果我是行錯方向，最後去到目的地是已經全身濕透。真想把那本書買下呀，不過下個月我想先買一部notebook給自己，如果有閒錢，才考慮買書吧。

現在人人都講「風水」，先有某政府機構動用十幾萬睇風水(要睇三次風水就擺明個主管同埋個風水佬有問題！)，後有某「風水師」正忙著繼承遺產。我好相信真正既術者係有術德，如果你懂得術數而利用呢樣野黎做壞事，則果報必定加倍，此為「知法犯法，罪加一等」耶！食晚時同事戲言要轉行睇風水，我就話以風水術數結緣就最理想，如果我識既話，幫有緣人睇睇，快活之至。

好認真咁同上司傾傾公司既內部人事問題，老實講，我對於佢話某同事決定唔走呢個消息，感到好失望，因為我覺得呢個同事已經好冇心機做野，一星期五日番四日，十一點返工，六點走人，呢種工作態度好唔要得。不過係我都唔走啦，出面仲有邊度可以有人咁種佢！

晚上專登收看《一生為奴》，我已經好少咁專登收看電視劇，睇《一生為奴》係捧陳寶國既場，佢之前演出既《漢武大帝》既劉徹(即漢武帝)令人一看難忘，唔知呢一套又點呢？阿哥最唔想睇清朝既戲，因為佢覺得當時中國國勢好弱。我就冇咩所謂，一、二百年既衰敗對一個有幾千年歷史既國家真係滄海一栗，微不足道。於是我影印一份朋友俾我既notes俾阿哥，希望佢可以睇得宏觀一點，呢份係1934年在上海出版的《東方雜誌》第二十二卷既一篇由中國地理學家李四光寫既〈戰後中國內戰的統計和治亂週期〉，將秦朝到西元1927元既治亂做一個統計(又是統計！)，得出幾個重要循環：國家統一；紛亂；大土木工程；盛隆時代；由盛轉衰；北方民族興起；首都南遷；南北分裂；大瘟疫等幾個現像，當中更替有律，讓人窺見歷史的趨勢！

中國文化之可以源遠流長，唔知同風水又有無關係呢？