再談Zero Zero Five

我係由去年九月(亦即係開始寫呢個blog個陣)開始月供股票，由於初入股海，為減輕風險，我就選左005，每月供款5,000。我係一個好大駛既人，好多時候都會買左一d唔需要用既野，即係唔等駛既野番黎，於是就用月供黎迫自己儲錢。

八、九個月之後既今天，005既股價由$140上到$149.9又落過$135，迄今平均買入價(連埋以股代息既新股)為$138.211，現價報$144.00，有4%增長，P/E 係13倍左右。過多三個月，我就儲夠一手005。

其間我係$5.6左右入左3328交行，不用三個月，佢就升左70%，即係$9.6~9.9左右，P/E 係40倍左右，個一排，我好唔安樂，因為佢既P/E同其他中資銀行股一樣，高得令人不安。結果，我係$9.6就放左佢了。事後睇番，呢個決定係非常正確。

由始至終，我只想做一個安樂既投資者，即係放d錢係我信得過，賺錢能力高既公司上面，如005，945，由佢地公司既職員去為我搵錢，豈不妙哉！就算005係一隻大笨象，又如何？只要佢賺到錢，升上$200都可以安心持有。如果買左股票會令人坐唔安食唔落，咁就可能要搵人幫你理財了。

因為手頭上冇乜積蓄，所以我係開始月供既同一時間，開始用spreadsheet認真咁紀錄每日既開支(我留意到有朋友都有呢個良好既習慣，真係非常好！)，並且限制每月消費不多於$2,000元。今日，我終於都儲到少少錢，打算由六月起調高每月消費為$2,500，增幅高達25%，至本年底再作檢討，而且會係還完債之後，考慮月供多隻股票。

記得大概兩年前，當時我無野做，戶口得番$4,000蚊左右，我買左一份比戶口總值高三倍既禮物。下個月，我會買同一性質既禮物俾自己，而今次，我動用總資產既一少部份(即少於10%)就已經足夠有餘。至於我好想擁有既Cambridge Audio CD Player，雖然係$5,000樓下就買到，不過要等下半年或者明年先買矣。

用005做長線投資對象，令好多人都話我傻 (當然，in all aspects of life都有人話我傻)，不過我相信，我係咁每月供005，十年之後，收到005既股息會多過我第一年投資係005的總金額(5,000x12=60,000)，所以，我會繼續以股代息，繼續播種。

收割不在今天。

我會將儲蓄既進度寫低係呢度，二○一六年九月，睇下上面講既野會唔會兌現。