那一天想起「妳」 (080609)

唔知從幾時開始，Jeffreality好耐都冇欣賞過office對出的海景。坐係我個位望落去，見到中環填海工程既地盤，直線或者向上望，就見到IFC，天氣好既時候(例如今日)，仲可以見到一片片白雲飄過，想起細細個既時候，舊居對出係碼頭，可以望到海同藍天，放暑假呢，就最喜歡訓係張床度望住藍天白雲，個時未有wall building，加上屋企近海，非常大風。今日呢，涼風不再，原本係碼頭既地方已經起左一幢幢的維講灣及O海城商場啦，那時候在碼頭釣魚既地方，已經係今日O運站上車既位置。

嗯，講番office，再望右少少，見到一艘艘船係維港海面穿梭，再把眼光放遠一點，就是荔景/葵涌既貨櫃。 其實我幾喜歡呢個位，當時初搬入黎呢個地方，我一揀就揀左呢個位，貪佢有「景」。殊不知，日忙夜忙，都冇咩時間欣賞呢個景。

***

呢幾晚都用黎睇碟(個人認為此舉是極度放縱既行為，因為呢個假期應該要清左之前累積既工作)，於是租左兩集Fantasy 4，蘋果核戰爭呢幾隻純官能刺激既戲番黎睇，讓大腦休息休息。

雖然係咁追求刺激，但係都揀左一隻買左好耐但係未睇既DVD，係李安係八十年代執導既電影(好似係佢第一部執導既電影) - The Ice Storm，套片開始係講個仔睇Fantasy 4既漫畫，有感而發覺得Fantasy4處理問題時，就好似一家人咁樣去睇成件事。

片中講一個Family，有老公、老婆、阿仔、阿女。老公因為生活既枯燥同埋太太同佢係性生活方面不太協調，結果就同鄰居太太搭上。十幾歲既阿女好想嘗一下禁果，偶然之下同鄰居既兩個仔來往，卻在屋內親密的時候給父親碰個正著(因為父親剛巧係間屋度等待與鄰居太太偷情)，因為咁，令老婆得悉老公同鄰居太太有染，馬上嬲左老公。當晚兩公婆去左一個key party(我當時唔知咩叫key party，後尾先知原來係換妻派對)。最令我深刻個幕，係最後剩番老婆同鄰居老公(老公因為一些事俾人扶左去洗手間，而鄰居老婆就同一個後生既男仔走左)，佢地心理掙扎之後都發生左關係，之後老婆馬上返番個party既洗手間搵番老公，好溫柔咁叮囑老公要等酒醒先番屋企，有咩就返屋企先講咁。可能Jeffreality接受唔到「key party」呢件事，覺得當一段關係，兩個人既身同心都唔再單純咁屬於對方既時候，一起下去只會傷害更多更多的人。

套電影幾有意思，希望有時間再睇多次吧。

***

下午係寫字樓，有朋友從msn邀請Jeffreality玩接龍。好久都沒有在msn玩呢類game了(但係成日坐車時用部PDA玩)，有一排經常同朋友玩接龍，嗯，就在那段失戀既日子。 那時候，工作很悠閒，可以在office對著電腦玩接龍。那幾千鋪接龍，有九成五都係個段時間玩番黎。

別人在你的生命中留下一些印記，但總不能用共處時間之長久來衡量那段關係的深刻，不管一個人、兩個人，日子仍然要過，無論傷口多深，總得找個方法讓他癒合。

***

呢段entry斷斷續續咁寫，而家已經係下午六點幾了，呢年幾時間，工作已經成為生活既主要部份時，Jeffreality唔知未來係點，但而家得好好的管理好呢一段純工作既人生部份吧。