新年願望

尋日Party既時候有人祝我：Get what you want in new year!!

我既新年願望係：

早睡早起 。

又一年

吃過今年的最後晚餐， 一個人坐嚮電腦前面，都係時候為零六年埋一下單。

個人

上半年情緒變化好大，下半年漸趨穩定。健康方面，腸胃仍有問題，出外飲食要小心。儘量避免外出燒野食、打邊盧、冷飲。上班自備飲盒。起居方面，零七年呢，要早睡早起，每晚一時前要上床訓覺，八時起身。

工作

上半年轉工。

到今日最令我困擾既係「公司」既人事，政治角力既場地不在會議室內，而在會議室外。唔理係做邊一行，始終有人既地方就有「角力」，就會有資源又或者權力既分配。同事之間既「角力」，會隨著新同事既加入而進入一個好定壞既循環呢？

零七年既目標係同時保持工作效率同學習既進度。

投資

八月份開始認真整理個人財務，由八月到十二月共五個月既財政狀況已經達標。九月份開始月供005，同時買入兩隻股票，分別係945同3328。近年尾，中字頭銀行股升勢凌厲，3328到十二月已經上升近八成，P/E ratio高達四成幾(用零五年既盈利計)。我相信人人都認同內地銀行同保險業係未來二十年既「千里馬」，將會嚮中國呢一片大草原上奔馳。不過當人人都瘋狂地將資金投放到呢類股票上面，就係我恐懼既時候。我好相信中字頭既銀行同保險股仲得升，不過我既心態係做一個安心既投資者，持有現價既3328令我好唔安心，所以早幾日已經將佢沽出。

我係一個冇賭博命既人，今次可以從3328處獲取高比例的利潤係有多少運氣既因素。當我再買入股票既時候，如果基本因素唔改變，下一隻股票將會至少持有五年。必須承認，太留意同貼近市況係會容易墮入股市既心理圈套。

07年繼續每月儲蓄計劃，預備金錢進修之外就要增持現金。

聖誕雜記

原來我都好喜歡用‘雜記’ 、‘隨想’呢d題目，可能代表我既生活係無事可記，平凡不過。

開呢個blog既目的，都係想記錄一下個人感受同埋經歷，現實生活中，有時唔太容許以真面目示人，所以在網上闢一個部落，可以將感受感情「盡可能」表達出黎。我邀請過幾位朋友黎呢個blog，其中有曾經好親密既人、好朋友、甚至係一d我從來都未見過面既人！不過能夠嚮呢個地方相聚都係一種緣份。

嚮呢度我要同各位乾一杯，為我地當下既緣份乾杯！順祝各位聖誕快樂。

朋友聚舊

近來見番好多朋友，享受左幾頓美味大餐，不過個腸胃唔係好得，唔可以吃得太多美味既食物。我好喜歡同朋友一大班人既聚會，不過同自己鍾意既人，我就會選擇單獨相處了。

尋晚搭地鐵既時候，見到一對拖住手既男女，佢地企嚮我對面。九點四十五分，往柴灣既地鐵車廂，竟然唔係好多人，順理成章，我好清楚咁聽到佢地既對話。女既同男既講佢過往既平安夜點過，包括同佢既前夫同個ex點過，我見佢講野時候既眼神好平靜，落車既時候，仲好緊緊咁又好開心咁拖住佢男朋友咁，嚮個一刻，我想起我既朋友。

我的母親

呢個聖誕節得廿五號晚可以陪屋企人，其實屋企人，都係講緊阿媽子。

朋友經常會話我陪唔到佢地，其實好多時候我唔出去既原因，都係因為我想陪媽子。

阿媽佢今年都五十幾了，在一間美容院執頭執尾，比起以前既工作，而家呢份就真係冇咁辛苦。為人子女，總係想佢可以嚮晚年既時間做佢想做既野，尋日番工之前，我問佢幾時會唔打工，得閒同佢既朋友去玩下，或者學下野，做下義工咁。佢就話等人炒佢既時候，佢就唔做。有時我都好矛盾，每個月我都好想俾多d家用佢，不過我媽子呢，如果我俾多d佢，佢就會轉頭俾左我阿哥，又或者俾左我老豆。佢既積蓄已經早就俾阿哥花光，嚮佢呢個年紀，竟然連少少既「私己錢」都冇，個家有好多野都令阿媽子擔心(例如比我大近十年既阿哥，佢咁大個人仲係好依賴阿媽子)，所以我從少都明白，我一定要顧掂自己，唔令佢擔心。

阿媽子通常一個人嚮廳，阿爸(我好耐冇叫佢，所以唔記得之前叫開佢阿爸定老豆家爹地)困自己嚮房，為左令佢冇咁悶，我會陪下佢，有新戲既DVD，我一定會買番屋企同媽子一起睇。

阿媽佢一個月比我花更少錢，當我大洗既時候，就會想起佢每日都好克儉既生活而令我好歉疚。

阿媽子既心願係嚮家鄉起一間老人院，因為佢既父母親晚年既時候都係因為欠缺照顧而過得唔係幾好，所以佢好希望其他人老人家有所依。日後我一定幫佢還呢個心願。

小記

午飯時間既Office好寧靜，加上聖誕臨近，同事們都準備好假期既來臨。

下星期有新成員加入呢個office，唔知對同事之間既關係會帶來咩既改變。office既氣氛自從呢兩個月就變得好沉寂，上司心事重重，對下屬(如我)都係擺出事不關已，已不勞心既態度，有時就俾下說話我同另一個同事聽，處身呢個環境之中，我都係要繼續要踏實既工作。

凡事都總係要兩手準備，我好明白呢度既發展空間有限，另一邊亦要為將來打算。

近來心情有些煩擾，呢幾晚都係早一些返屋企休息。

Christmas and New Year

外遊回來之後，生活節奏馬上回復往常咁急促，每晚番到屋企，食完飯、沖完涼之後都十一點幾了，不過我仍然會晚晚聽一陣歌先訓覺，冬天聽歌既效果係唔錯，一來街上好靜，二來可以把窗關上，所以每一粒音都聽得好精楚，好舒服。聽歌係舒緩壓力既好方法。

朋友一般都會認為我好難約，因為明明約好左都會臨時變卦，工作上好多事候都有突如其來既事發生，有好多突如其來既會要開，令我都非常唔好意思。

聖誕節既安排係咁：

廿三號晚朋友聚會；

廿四號晚朋友的結婚周年紀念；

廿五號晚可以把時間留給自己，安靜的在家中渡過，好好的為下一年做打算；

廿六號晚有人約食飯。

廿七號晚有大學同學結婚，當晚亦同時見番一班舊同事同大學同學；

廿八號晚休息。(更正)

廿九號晚大學朋友既聚會。

睇黎我都好似一個上左年紀既老人家，仲係出左幾日街就係嚮屋企抖三四日個隻。:)

聖誕禮物

送乜野俾子女好？今日信報既曹仁超有好介紹：

畢非德、Mario Gobeli、林治三位投資界名人，皆係年輕時已對投資著迷。老虎活士兩歲開始便接觸高爾夫球……。今年你送乜野畀仔女做聖誕禮物？最實際係教曉佢地對金錢既正確態度。每天節省十元好好運用，三十年後係六百五十二萬二千五百二十元（以每年上升20％計），小小水滴真係可變成汪洋大海，小小沙粒組成神州大地。一切從小做起！七歲開始教曉佢投資之道及世界第十一大奇蹟（複利率），協助子女建立負責任既性格、對財富既靈敏觸覺。讓每一個孩子皆有權知道每天十元並以年率20％增長，三十年後可變成六百五十多萬元既事實。如兩歲開始佢地既父母每天幫佢地儲起十元，到佢地三十二歲已擁有六百五十二萬元，而且嚮財務問題上絕對聰明！上述才係最佳既聖誕禮物，保證佢一生受用；而非過分滿足於物欲，咁做只會害左佢一世。

是你嗎？

往飛機場的路程，想起一個人，唔，不是想起，是想著，因為我從未放下。

原來，我從未和你到其他地方外遊，唔，原本打算今年暑假和你去一下日本。那是去年暑假的計劃吧。都一年了。

在臺灣的街上，義美的門前，想起你。

或許你不知道，去年在臺灣，我要勞煩當時的領隊和同團的朋友替我四出找義美的門市。因為，你喜歡吃它的蛋糕。當時我去台之前已患了重感冒，五天的行程，有兩天都落唔到床，到臨行前當晚，有領隊和朋友的幫助，找到那個門市。不過門市已經關了門，我很擔心，擔心走之前我買唔到給你。

非常的幸運，當我回來時，你可以吃到美味的蜂蜜蛋糕。還記得，你有到機場接機，上星期日晚，在機場出境時，竟然想碰到你。夠無聊吧？

同事和朋友不太接受或相信我是「單身」這個狀態，有人問：「有冇新目標呀？」我答：「冇wor。」有人問：「眼角高呀？」我答：「冇wor。」繼續問：「諗住轉下性取向哩！」我會拍台之後用一些比較激動及足以表達本人情緒的語言回應。

其實我經常掙扎，好無聊既掙扎。每當想起你，就唯有馬上想起你的缺點，藉此抵銷對你的掛念，有時有效，有時無效。我會認為這個思想都好變態，因為當有一點情感產生，我會(要)儘力壓抑佢，成個人好似分裂左咁抗爭。為咩要咁做呢？

有重大事情發生時，雖然我知你唔係好知點俾意見，不過我都係最想同你分享，到今日仲係咁，我都唔知點解，係咪好愚蠢？

我都真係好愚蠢。

時間或者會沖洗過去，一年十二個月就咁過去左，記憶又沖洗左幾多？

保重

有朋友會在明晚入醫院「大修」，因為大家都冇可能係聖誕個時見，所以佢早前請我去佢屋企提早慶祝聖誕，食飯時見佢不停嚮老婆面前講今次要「行先一步」，個心唔係好舒服，但係我知道佢係好想俾定個心理準備俾家人。剛剛同佢通過電話，我話好希望明年我仲可以帶d碟去佢度聽，嚮呢度我衷心祝佢平安過關。

呢個唔係一個好時候行開，不過都冇得考慮咁多了。

個邊呢幾日都落雨呢....

安息

再見了。我的公公。