聖誕雜記

原來我都好喜歡用‘雜記’ 、‘隨想’呢d題目，可能代表我既生活係無事可記，平凡不過。

開呢個blog既目的，都係想記錄一下個人感受同埋經歷，現實生活中，有時唔太容許以真面目示人，所以在網上闢一個部落，可以將感受感情「盡可能」表達出黎。我邀請過幾位朋友黎呢個blog，其中有曾經好親密既人、好朋友、甚至係一d我從來都未見過面既人！不過能夠嚮呢個地方相聚都係一種緣份。

嚮呢度我要同各位乾一杯，為我地當下既緣份乾杯！順祝各位聖誕快樂。

朋友聚舊

近來見番好多朋友，享受左幾頓美味大餐，不過個腸胃唔係好得，唔可以吃得太多美味既食物。我好喜歡同朋友一大班人既聚會，不過同自己鍾意既人，我就會選擇單獨相處了。

尋晚搭地鐵既時候，見到一對拖住手既男女，佢地企嚮我對面。九點四十五分，往柴灣既地鐵車廂，竟然唔係好多人，順理成章，我好清楚咁聽到佢地既對話。女既同男既講佢過往既平安夜點過，包括同佢既前夫同個ex點過，我見佢講野時候既眼神好平靜，落車既時候，仲好緊緊咁又好開心咁拖住佢男朋友咁，嚮個一刻，我想起我既朋友。