入院 (090119)

星期五晚返到屋企，門一打開，見到老豆成個人企唔直，彎曲條腰，說了一句我二十九年黎未聽過的一句說話：「我唔舒服」，而下一句係：「我整熱d湯你飲，個爐(指打邊爐)你自己整。」行動時表情極度痛苦。

一問之下，是老人病，他說吃了些成藥，不過仲未見成效，但係痛到企又痛，訓又痛。我打電話給余小姐的老公，胡醫生，他說呢個情形是要去醫院，食成藥冇用。媽子剛係呢個時間番黎，我同佢就夾手送左老豆去睇急症。

媽子除左送佢入醫院個晚，之後都冇再去睇佢。

就算感情幾唔好，始終佢都係我老豆。我日日都有去探佢，每次見佢插住喉，心理總是不舒服，鼻子都是酸酸的。今日情況未有好轉，要留院多三日觀察。

在醫院的走廊，卻依稀記得05年年頭曾入院，都是同一間，住左兩日，還要要吊鹽水，那時候，總會想著深愛的人。幾位好朋友都有來探病，唯獨是她沒有，可能因為我們已分開了，她不會知道我的近況，我也不會知道她活得如何的好，直至今天都如是。小時候聽廣播劇《未完的小說》，有一句對白是人生就像一條平行線(下一句不記得了)，長大後，知道完成尚未完小說都要講因緣，種子會因為客觀環境配合而成長，境來心應，境去心無。

昨晚，余小姐打電話黎問候，問老豆幾多歲，我說是七十有四，佢就話，佢阿媽都係咁既年紀，呢個年紀係多d事幹。由此，我知道雖然余小姐是五十多歲，我是二十九歲，但我們的高堂都是同一年紀。