九月小記

看來我的blog可以叫作「網上月誌」了。好多謝仲有上黎呢度既朋友。

感情事．家庭事

一故事。p想同男友分開，不過全家上至阿嫲下至佢細路橫至e媽姑姊，都覺得個男仔外表敦厚，又做學術研究，有穩定收入，煞是一個標準老公的樣板，如果兩個有argue，家人都覺得係自己個女唔夠忍耐，唔識遷就人家。令p感到煩惱的，是男友會係唔開心既時候就搵野掟佢，又會打佢，不幸既係佢唔知點同家人講。如果佢真係冇分開到，都係因為唔想令家人失望。

希望呢個故事唔會有一個悲劇既下場。

投資

記得一個月前，中移動曾經跌到去76蚊嗎？轉眼間，豆腐渣已經變成燒鵝脾，股價已經升到$112.7，升50%。今日係百忙之中，都走左去樓下既匯豐更改月供股票既銀碼，下個月只供股$3,000，留起現金。

Too much

今日突然覺得好不安，工作同埋讀書已經令我吃不消，好似成個人失去左平衡一樣。

或者，只有咁樣，我先可以走出以前的陰影吧。

圖書館小記

每個地方、每個人都有一種獨特的氣味，不同的氣味往往會帶給我不同的感覺或者回憶。

我最喜歡到Poly拉記四樓期刊部讀書的，個度人較少，容易集中精神。今日重臨舊地，個度依然有好大陣「雜誌」味。圖書館有幾種味道的，有「書」味、「影印」味同埋「影音」味。本來我想去拉記備下課的，不過書架上既書更加吸引我(因為平時冇得睇！)，於是成個上午就係咁睇書，差d連堂都唔記得想上。

有篇好令我震撼的個人專訪，就叫被訪者做L吧。L同我對金錢既方法都好一致，就係「金錢是生活的保障，而不是追求享受。取之予，用之予。」。L成立左私人基金，除左基本生活費及教育費外，不打算將家財留給下一代，以鼓勵佢地積極做人。不過，如果佢地想參政，基金會撥款支持競選。L說，這是參考美國甘迺迪家族的做法。當年佢見到程戒南當年因為幾萬元而身敗名裂，感到可惜，佢話：「...希望兒子參政的話，不須依賴任何財團既支持，亦不需要高官勾結，真正做一個有良心、為香港利益的政治家。」睇完之後不禁倒抽一口涼氣。

環觀香港的政治圈，資源豐富的親政府陣營沒有勇氣去突破既定的框架，另一陣營雖然得到大部份的港人支持，不過就欠缺資源，以政治為終生事業的年青一代更加欠缺前景，欠缺所屬陣營的財政支持。青年人以從政為事業，收入極可能會唔及同年紀既人多。人到中年，一比之下，自卑感油然而生，亦慢慢減低對金錢的誘惑。我認為係呢個環境，任何人決定以政治為事業(不是職業)之前，必定要有一個穩健的財政基礎，足以解決一個有尊嚴的生活所需(包括個人及家庭)，更理想係已經達到「財務自由」，成為金錢誘惑的絕緣體。呢部份講住咁多先。

講番今日係圖書館，覺得自己對知識好hungry，好似一舊棉花咁係咁吸係咁吸，而且呢舊棉花係好快樂的。

不夠別人聰明，唯有以「勤力」同埋「持之以恆」黎搭夠！

將相本無種，男兒當自強。

睡眠

有些朋友經常失眠，眼光光等天光。

我好耐都冇失眠了，一係就坐係書房訓左覺、一係就係廳聽歌聽聽下訓左覺，又或者係床上睇書睇到訓左。

人家話容易訓得著既人係幸福既，因為有些人一生都不得安眠。

小記

因為醫療保險就黎到期，上司叫我出去搵幾個報價。我好樂意咁做，因為現有個agent都幾犯眾憎，佢試過叫我既同事唔好claim錢，而且態度又唔friendly，又迫我地同佢買保險！

佢個份續約既保價差唔多要件$22,000一位，我出去quote過六間，有五個都平過佢，最平個間都係$19,000一位！最後佢知道我地唔會同佢續約，佢就上黎死「lure」，我上司真係善良，仲肯去見佢。我都有份同佢開會，不過我好快就turn off左，因為佢講既野好唔專業，態度又差，又串，又不停話其他公司冇佢個間咁好。最後佢問我地因唔係因為人地平而唔揀佢，我上司好體面咁講話係其他公司既offer好competitive，員工有較多保障。

其實，就算你夠人平，我都唔會揀你，因為你個service好唔掂！有得揀，我地至係老闆。

上司要同老闆們解釋點解唔續約，send左個email問同事對現有保單既意見。我見其他同事冇咩反應，即係同佢地講如果你地唔出聲，我地就要用番舊個個，大家要發表意見！今次難得同仇敵愾，呢個agent自然冇得留低，就好似我其中一個同事話：「一於收佢皮！」

有時會問，點解去年我地會揀左一個咁差既agent，而且份保單又唔平，原來佢係我前上公既ex，所以份保險就搵佢做。而家多左接觸內部行政工作，就愈發現我既前上司幾咁唔稱職。

***

上午，樓下HSBC個何生打黎，話可能改唔到下個月既月供銀碼，即係話我下個月會供$15,000元落941。

***

下午同阿kate食飯，順便帶左佢買林心遲本書。佢黎緊會同男朋友去日本玩，真係令人羨慕。

***

今晚番學，星期五晚返1830至2230，我今日2100之後就已經咩都聽唔入耳了，做左一個冇靈魂既學生。

父母

好多人都會將八達通自動增值，我當然都唔例外。尋日，搵埋阿爸阿媽張八達通，幫佢地申請埋呢個服務。其實個一百幾十唔算係咩數目，只不過希望係生活既小事上可以表達到少少既心意。

從小到大，同家人既相處都非常唔理想，可能同上一代有代溝，同佢地既睇法有好多時候都唔相同，有時仲會因為咁而好勞氣。

一直都有打算搬出去住，擁有自己的空間，奈何咁樣會令財務捉襟見肘，所以更加要努力儲蓄。

自去年九月十二日開始月供以來，整個投資組合連埋已實現利潤共有33%升幅，一早已超過今年初定立的預期增幅及預期組合總值。

中移動(941)由八月十七日的入貨價$76.4上升到尋日收市既$102.1，兩星期既升幅有35%，差5%就到達我預計的07年合理價，就算而家有足夠現金都不會加碼了，只維持月供既習慣。

投資的質素是十分關鍵，集中三、兩隻「千里馬」，好好監察佢地既業績及營商環境，比同時持有十幾隻股票更有效管理好你既財富。

***

唔知幾時可以行開下呢？

真係唔好意思

首先要同各位講聲唔好意思，因為而家黎呢個blog要先login。希望儘速可以處理完一d問題，令大家可以好似以前咁自由出入。

***

上個月收到稅單，計一計，如果我唔係同父母同住，又冇供養父母，咁我要交多十倍既稅，既係差唔多一個月既人工。

近日有高層講同我講，知道呢幾排舊有既同事都係呢一年黎都好辛苦，所以黎緊「應該」有人工加，有得加當然係好事，不過去年加人工時我都講過，係呢度，一日未收到加左人工既薪水，一日都可以有變數。如果有得加，都會蓄起佢囉。

***

近排好多新同事番工，其中一個係幫我既。雖然我形住佢唔會做得耐，不過我都好俾心機教佢，其他口痕既同事見到，就好無知咁以為我對佢有意思，仲周圍同人講，仲要製造下機會俾我咁。我一直都避免係辦公室同其他同事發展呢一種關係，咁做會好影響工作情緒。

***

話咁快，八月又就快埋尾。呢個月，要負責既工作愈來愈多，我知道上司係刻意俾多機會等我去發揮，不過實在太多野了，星期四晚三點幾做完野後第二朝八點幾番到去，工作既時間多左，讀書既時間一定因應減少，呢個星期一定要追番個進度了。

生活上好多野要取捨，工作、讀書係首要集中精神處理既事，至於我好有興趣既「數」，就要放低一下，過幾年有時間再學番了。

同學

星期日，上十點既堂，九點就去舊can享受一個簡單又豐富既早餐，火腿蛋加一杯熱朱古力，都係講緊十一蚊。

九點半，去到課室門口，已經有幾個同學到左，九點四十五分，距離課堂開始既時間仲有十五分鐘，已經有三十人係度等開門。我唔知呢班同學聰唔聰明，不過我係讀undergrad個三年，都未試過上堂前十五分鐘已經有30-40%要上堂既人楝左係門口度，可見佢地係幾咁勤力，幾咁認真。

而我呢......

***

你好嗎？

今個暑假過得開心嗎？應該去過旅行吧？應該開始上班了吧，有睡過頭嗎？同事對你好嗎？沒有暑期工的不快經歷吧？應該七點就可以放工了吧？有在附近shopping嗎？有儲蓄的計劃了嗎？

.....你已經不是當時的你了吧，我也不是那時候的我了，一切都彷似那麼遙遠虛無，書枱上信封內的悄悄話，真實得一切好像沒有存在過一樣，錢包，仍然覺得沒必要都沒打算要換過另一個。如果不看日歷，都記不起那個月的事，可是那一年，卻無可奈何的跟歲月一樣深刻。

豆腐渣價錢

當中移動(941)既股價低過80元，就是「豆腐渣價錢，燒鵝脾味道」。尋日係下午開市既15分鐘左右，市場出現大量賣盤，恆指見19600點，941、2628、5股價狂瀉，最底分別見過$75、$25、$131元，超級抵買！我非常幸運，以勁抵價$76.4買多一手941，而家我總共有兩手中移動了。呢兩個星期，我用左7萬銀去入市，已經再沒有多餘的現金，不過仍然唔打算減少下個月既月供金額。 到今日，我仍然記得零五年年初銀行戶口剩番千幾蚊時既徬徨，但係都要到去年八月先痛定思痛，開始認真處理財務，唔會再令上述事件發生。

中移動既合理價絕對值$100，根據上星期公佈的半年業績，保守預計07年有25%增長(G)，PE/G=1，PE=G=25。上半年每股賺1.91元，預計全年每股賺4蚊，P=25xE=25x4=100，所以係年底前，只要佢一日未見100元，我都會繼續收集，愈跌愈加碼。

股價上落並不可怕，可怕的是群眾情緒。Beyond greed and fear，只有了解價值投資，才能無視與公司業績無關的因素(例如群眾的愁雲慘霧)，為你在股海領航。我好感激可以係林心遲既書入面學到呢d智識。

***

尋晚上堂，只不過係遲到5分鐘，都已經冇得坐頭幾行，迫住要坐尾二個行，令我好唔習慣。今日決定早30分鐘到課室搵個前d既位坐。上課既時候，只掛住聽書，同學之中有冇靚女，我完全冇留意。

***

Office經過一輪大執位之後，當初成立時既幾位職員，只剩番我一個。真正要做好一份工好容易，最煩惱既只有當中既人事。沉著氣，多做事，仍然係我工作既原則。努力工作，專心讀書，儲蓄投資，生活都一樣寫意，永遠相信雨天之後必見晴天！

一次特別操作

見個市跌得咁勁，係時候收集優質股了，不幸我既資金實在太少，只勉強夠買一手中國人壽。

而家共有2,167股中國人壽，平均價上升到$27.625，今日收報$28.6，比昨日收市跌4.6%。

今年既帳面利潤由17%急降至3%，不過我唔需要賣出我既三角組合(5, 941, 2628)，亦睇唔到驚惶失措既理由。下個月，決定用埋最後一筆資金，$10,000供中移動，$5,000供中國人壽，愈跌愈買。每月繼續傾全力用$10,000元月供股票，直至恆指上番23,000點。

中移動今日公佈中期業績，每股派$0.922中期息，增長25.7%，預期07年每股賺4元，現價80元，預期07年PE: 80/4=20, PE/G = 20/25.7% = 0.8<1，是買入的信號！

中移動派息依然慷慨，業務增長強勁，你我依然樂意繼續做佢既股東。