分離仍是愛

愛情或許是佔有。偉大的愛情卻一定不是佔有。

是一段拖拖拉拉的十八載感情，男的是一個有家室的丈夫，十八年來卻在老婆與情人以外繼續拈花惹草，情人終忍不住積累的煎熬，提出分手。男的苦命挽留。女人的黃金歲月已經隨風。

繼續一段如此的感情只不過是延續一場消耗耐力戰。如果男方真的愛這一位女人，一位十八年來背負著一段不可能開花結果的女人，在這個關頭，男人不應苦纏，而為要分離作打算。而女方，要學會如何一個人面對往後的日子。

不是長得高，肩膀壯寬的就是真男人，真男人是懂得如何去愛他的女人。有些時候，放手，讓愛人走出去，開一片天，這是愛情崇高的表現，如果你是真心真意愛一個人，該是讓她/他追尋更理想的生活。佔有的愛情只不過一種自私的表現。

而且這是不分男女。

睇醫生

爸媽係有病都唔會睇病既人，但係隨著佢地年紀漸大，毛病自然會愈多。好耐之前知道媽子有d病痛，經常勸佢睇醫生，不過佢都唔肯。

尋日起身，知道阿媽終於肯睇醫生，我就急急幫佢預約(都幾有mixed feeling架：開心係佢終於肯去，唔開心係個情況一定係好嚴重，所以佢地先肯去！)，由於阿爸都有同樣既問題，所以安排左佢地兩個係同一日去睇醫生(後來仲知道我阿哥近期都俾呢d問題困擾)。佢地雖然肯去睇，不過我知佢地一定會怕貴而唔肯接受一d療程，所以我同媽子講，我會請假陪佢地去，有咩唔妥就一次過處理好哂，唔好怕貴而唔肯整，而全部費用係由我出。我相信四萬蚊就應該可能攪掂哂所有野。

初出黎做野，我差唔多將一半既人工都俾屋企做家用，五年後既今日，每月我只係俾16%既人工做家用，唔係因為我薪水多左，而係個金額比以前少左四成。原因係阿媽有多餘錢剩就會俾哂阿哥，我為左唔想咁樣，因此家用愈俾愈少，夠駛就唔再俾，至於屋企要買野，例如電器，我就好樂意付全費。

阿爸阿媽好大個先生我出黎，細細個既時候，我好擔心日後佢地有病痛時我冇能力照顧到佢地。今日，當佢地要去睇醫生，我好好彩，至少係金錢上已經有能力去照顧佢地。如果唔係既話，我會抱憾終生。因為呢個係為人子女最基本既責任。

93年出品

93、07之間，相隔不過14年，14年，只留下了一點點痕跡。

做事

今日睇電視，見到一條問答題，題目好似係咁既：

如果你喜歡某一種工作，不過家人反對，咁你會點做呢？

如果係你，你會點揀呢？

我既選揀一定係做自己喜歡做的事。如果你唔喜歡你既工作，又點會做得落力，又點會上心呢？

初初出黎做野，個陣係02年，市道開始轉差，我係大學時候成績唔算突出，唔知係幸運定不幸，我去左一間大firm度做，人工係當時黎講，算係好好架，老豆個時知我咁早就搵到工都不知幾開心，而個陣我以為出黎做野之後，阿媽可以唔做個份高度勞損既工，估唔到就係因為佢唔俾阿媽辭職，而令我同老豆既關係變得惡劣。

言歸正傳，做左幾個月，都唔上心，嘗試好努力咁去做好份工，往往都係事與願違。我對份工既感覺係份工好封閉，好似外面發生咩事都對呢一行都冇咩影響咁。

有一日，我望住坐係房既associate，心想，如果二十年之後，我好似佢咁，我會唔會滿足呢？我仲後生，我有好多野想見，好多野想經歷，我想出去感受一下個世界，我唔想浪費左我既生命係一堆無意義的工作上面。

由呢一個念頭出現開始，到離開呢間公司，中間相隔左十八個月，其間經歷好多掙扎，有個人既，有家人既，亦有好多失望挫敗既時刻，例如見過好多份工但唔請，發夢見到associate追我交功課等。星期日既晚上，我都好唔想星期一既來臨，因為要返工。

04年5月，我未搵到工，但係我覺得係時候靜一靜了，而且同家人商量過，可以休息一會，加上另有打算，所以辭職了。而那一班同事，是我合作過的同事中最單純的，和他們在工作以外的相處時間是非常愉快，那是出來工作之後最簡單的交往。

6月離職，當時既計劃係等到7月，睇下有冇機會做義工，如果有，就做，冇，就搵工。唔知係幸運定不幸，7月份，真係有機會參與我好想參與既事，而我亦想唔到，呢一個決定，係可以有咁深遠既影響。

三年了，係呢個圈都快三年了，我唔會話我而家呢份工好好，人工ok，不過工時係超長而且係吃力不討好，二來，家人仲係唔係好喜歡，三，更難找到女朋友。但係，而家我每一日，都好平靜咁返工(有時都幾愉快啦)，好努力咁係工餘時間充實自己。

而係家人反對同興趣之間，我好容易咁選擇左後者。或者係經歷過一份唔係咁合心既工作吧，所以遇到一份有得發揮既工，會特別珍惜，更會令自己投入其中，享受當中每一個過程，從而感受生命力的震動。環顧身邊既朋友，又有幾多可以搵到自己enjoy既工呢？

轉變中的九龍西

細個既時候，係屋企可以望到碼頭同埋對出既海面，同埋中上環一帶。下午由四點睇卡通片睇到五點幾、六點，之後就會走去房度，成個人好似隻馬蹓咁擒住個窗花，望住海上面紅日既倒影。

個時家境好貧困，不過都可以隨時欣賞到咁迷人既景色。

今日，如果我再番舊居，就只會見到原來的海港上，已經起了一幢幢密密麻麻的高樓住宅，叫佢地做「屏風樓」。隨著見到無敵海景既住宅賣得愈來愈貴，低收入既人愈來愈分享唔到海景，唔知係唔係巧合，社會既貧富懸殊亦同時間愈來愈嚴重....

Scan....

今日買左部scanner，千幾銀既型號已經有好好既質素，得閒可以scan番舊時影既相。

第時畫畫，可以直接擺佢去scan，唔駛用部相機去映了！

是緣份

熟悉我的朋友都知道，我成日都話如果你要學投資，就要去買「林心遲」本書，就去聽訪問佢既節目，買有佢既訪問既人言報月刊。本書雖然係兩年前出版，不過到今時今日，我有時間就會由頭睇一次，加深了解基本分析既框架。投資係一門好嚴肅的工作，買股票唔係買幾個數目字，更加唔係「六合彩」式的賭博，而係入股一門賺錢既生意。由於我地係用緊既係血汗錢黎投資(出黎工作之後，先真正明白咩叫血汗錢！)，所以更加要認真去看待及善用金錢。

如果你因為咁而去聽/唔聽林大師既訪問或者睇/唔睇佢既書，呢個係緣份。

如果你聽完佢既節目，明白左佢既分析，之後用你既血汗錢買佢推介既生意，又不斷收集，呢個都係緣份。

繼早前係$70.6入左941之後，我早兩日都用左$24.9入左中國人壽(2628)。我唔想持有多過五隻股票，所以會等待機會放左中國銀行(3988)，好好照顧兩、三隻搵錢既股票比所謂既「分散投資」更有效咁令財富增長。

第日，如果我既財富達到某一個目標，已經可以令我達到財務自由，又足夠保障我同雙親既退休生活，咁額外既金錢係一定用來回饋社會，因為到最後，呢d都係帶唔走的。

朋友小記

也許是藉口，也許是一些原因，我少聯絡了一些朋友。有一晚，聽筒的另一端傳來朋友的飲泣，是十八年感情的完結曲。十八年，對一個女子，是一生的青春。無言，老實，我都唔知可以點安慰佢，沒有意義的安慰就變成形式。旁人都會覺得，離開比一起好，因為這一段感情是絕不可能開花，但係係感情事上，我老是覺得自己不宜俾任何意見，因為我都處理得好差好差。我只知道，坦誠、專一、負責任、包容、為對方付出、為對方著想是每一段良好關係既必然條件。

總覺得，唔出席朋友之間的social場合係無咩問題，不過當朋友遇到問題又或者低潮時，就唔可以唔理。朋友想終結自己既生命，我當然力勸佢唔好諗埋一邊，佢又好激動咁話見唔到我可以出人頭地的日子，我一時語塞，想起身邊既女仔朋友大部份都相當另類，平日對我既態度都比較豪邁，不過打從心底，大家都好關心對方，好想我好。

係呢個真係唔知講咩好既時候，唯有隨口就講左一些故事俾我朋友聽，講完之後，大慨係因為我d故事唔好笑，令佢好嚴正咁指責我講野冇「得得地」咁幽默。我話我不嬲都係一名大悶蛋，不過如果朋友唔開心要去看海的話，我都會義不容辭的。

今日再打過電話問候，看來情緒是暫時穩定下來。

***

另外一朋友因某些原因離職，下星期會去二見工，我衷心希望佢可以成功。

***

今晚同舊同事欣尼食飯，居然講左一d令我好驚訝又感動既說話。好多朋友都對我好有期望，好似上面位朋友咁，好想我可能出人頭地。

二十年之後再睇番呢個blog，我知道亦深信，我到時一定唔會令佢地失望。

拜託，不要再傷風

終於買了一份人壽加醫療的保險。我比較著緊老年既醫療開支，所以我同agent見面之前會同佢地講明我呢個要求，我既醫療保係去到100歲(我邊有咁長命呢)，而最後個policy都未超出預算。買保險既原因，係唔想自己出左咩意外，而要增加家人既負擔。由於我唔想每月分期供，於是選擇左每年俾一次。保險加上下個月要交兩萬幾銀的學費，又要買notebook(仲未有時間去睇)，因此呢幾個月既開支會幾大，令到手頭只剩20%左右既現金。

星期日，終於做左一件我本應由四月開始做既事，好希望我可以每天早上七時左右起身，一星期做兩至三次先番工。不過，好多時呢d野會做做下斷左唔做，唯有嚴守紀律，加強自制。由於太耐冇做，做完之後個膝頭哥攰到行唔到咁濟，十分鐘既路程要爬番去咁濟呀！

星期日要去做野，去到工作既地方，突然間落左好大雨，我冇帶雨具，後果可想而知，拜託，明天起身時，唔好頭暈身慶，我不想再傷風。今日行既時候，同兩個人傾左好耐，一個係胡so張，佢行埋黎話佢做左一個好錯既決定(咁即係要幫手啦)，咁我就順便幫同佢講我有個朋友好有興趣apply佢office份工。阿wen，之後就靠你了。另一個係連打，同佢都幾好傾架。其實我好喜歡呢類同人相處既時間，縱然今日個人係濕哂，我都非常enjoy。

選擇

Winston Churchill講過：' We shape our buildings, and afterwards our buildings shape us.'

***

每個人都一定有一套獨特既生活態度同埋處事方式，令你成功的一套放在我身上，可能不管用，反之，我的一套放在你身上亦可能是行不通。

我們要經常作出決定，揀讀邊一科、做邊份工、結交朋友，每一樣都多多少少影響往後的人生。人生中，重要的決定不外乎三數個，在交叉點轉左或轉右，是可以有兩個極端的結果。

***

呢幾排身體唔好，去左睇中醫，希望可以調理一下。醫師執左兩劑過我，原來調理身體既藥方係唔苦的，而且仲好好飲tim。尋晚飲完藥之後，唔知點解，九點幾就開始好眼訓，迷迷糊糊之間就訓到今朝六點幾。

睡眠充足，心情都平淡一點。

我是好享受每一日當中既安靜平淡時間。例如，我會選擇揀一條少人行的路由旺角行番屋企、聽歌、睇書，呢d都係令我心情寧靜的方法。我唔係任何事可以睇得開，睇唔開既時候，書本就係開解我既最佳工具。

每個人都有一條獨特既路要行，緣份到就遇上，緣份去就離別，聚合或許是人生的常態，得失有時也不必介懷。

小時候，父母老師教既野你仲得記幾多？佢地都教我做人要誠實正直、助人為快樂之本、勿存害人之心、做事要負責任、勤奮、用功。長大後，依著小時候的教訓去做人，有時候(或者經常)都會吃虧、蝕底，但係回頭一諗，立身處世，只要本著良知，無慚於心，又何必處處斤斤計較呢？

是選擇決定命運，還是命運決定選擇？

沒所謂吧。