開心

十二月是一個駛錢的月份。先買了一對鞋獎勵下自己(有七折)，再買了一套書(有八折，係個套舊年話買，結果到今年年尾先捨得買個套書)，就係咁，花左成幾千銀。

當然，題目講既開心唔係建基於金錢之上既，開心既係尋晚開左一個好有意思既會。

去左屯門開會，原定是八時半開的會卻以為是七時半開，結果我早到了，於是係我第一次踏足既屯門市廣場行左個圈。尋晚個會議非常流暢，是那種很做實事的會議，討論偶有吹水之外，其餘都很有point，參與其中是很令人振奮。我為這裡的人高興，因為大家都有一份很難得的「一起打拚」精神。開兩小時半的會議一點也不累，只不過一完會就餓了。約了朋友到旺角吃飯，到十二點去到旺角時(由屯門出旺角要一小時)朋友卻放了飛機，於是獨個去樂園吃了一碗麵，再去DVD店二話不說就買左一隻之前賣$132而家賣到$73的DVD，抱著執到寶既心情，一點鐘返到屋企。

曾經覺得做呢份工(甚至，做呢行)唔會搵好多錢而擔憂，始終，兩老年事已高，我責無旁貸的肩負起要照顧佢地既責任。去年受呢種極度既不安全感既激發(太陰坐卯守財帛宮對照太陽坐亥守事業宮)，因而的起心肝，努力儲蓄。 慶幸今年係理財進度上非常理想，就算恆指由三萬高點去到而家既二萬七都唔太影響我既積蓄。大家都知道，真正既快樂唔係由財富增長而黎，當我要離開呢個世界時，一定會將積蓄投放係世間有需要既地方。

加左人工之後，可以儲既錢多左，又可以俾多d錢屋企人駛，不過在工作上就要更加賣身了。工作既範圍既廣而遠，而家最需要提升個人能力。

是政綱

那天晚上，有人拉我到會展的螢光幕前，17萬對14萬的結果就打在眼前，他指著結果對我說：「這17萬票是香港人給FM的最後一次機會，明年，你找到一個令他們再投這個檔一票的理由嗎？」

一直以來，FanMan除了高舉文主，佔領道德高地之外，還會說甚麼？不要跟我說支持最低工資，那是一個幌子。如果要痛定思痛，那就是確立定位，究竟如何爭取到中間選民的支持。

而家FM有26席，明年九月之後，如果議席減少，那麼就可以被宣傳機器理解為香港人不支持FM，又或者FM已經沒有市場。

但，我最關心的不在26席，而是當中那6席。試想，如果FM的議席少了，不過民攻檔的議席不變，甚至增加，那便更加確立「凡是反對」陣營中的第一，是名正言順的第一。說到尾，民選出來的人最大的資本就是民意基礎，如果沒有基礎就沒有議價能力，沒有議價能力就話唔到事。要做，就要做到最大。

有人問，而家可以做d咩，我說一是鎖定人選，二是開始認真準備政綱，這不是一兩個月就攪得掂的功夫。

對方笑而不語。

班底

一件事情的成功，除了時勢之外，人事亦是關鍵。

明年的目標清晰明確，各路人馬早已磨拳擦掌，不要以為Bowtie那麼好死，送我們一份聖誕禮物，其實，這份禮物，是送俾佢自己的，又或者，俾佢老闆的。那些機關算盡的編劇，早已把劇情一早寫好。

其中一份劇本就係政府係明年派糖，係一粒夾心糖，一面係有咁多盈餘下既美好糖衣，另一面就係資金豉油行，而甚麼甚麼20xx的方案，一定是夾在中間的那一層。

你們用甚麼去爭取更多中間損民的支持？

在一切計劃開始之前，我希望有一對得力的左右手。

期望

是太太的答謝大會。

個人對升職一事處理得異常低調，報紙都係略為講過下，但各人見面時都前來祝賀一番。在這裡，得到別人的肯定及認同絕不容易，一舉一動都被三百六十隻眼睇實，想幾挑剔有幾挑剔。

有人問：「你咁後生，係呢行先做得個三年，已經坐到呢個位，你得唔得架？」我心想，其實我對自己都有缺乏信心既時候，加上而家人手緊張，好多野想做都未必做得到。不過坐得呢個位，就算點唔掂，都要死掂佢，一個人既力量始終有限，一定要各方面既人一齊推動先可以做到成績，所以如何令各人都各師其職是一項非常重要的工作。我地呢類幕後既人，就係要做好後方既角色，為前方上戰場打仗既人提供最好既支援。

會場內杯盤狼藉，好不熱鬧，我在接待處附近，靜靜的仔細聆聽各人的意見。

散場時，有人行埋黎話：「原來你就係Jeff，民攻檔既人果然比白鴨檔既人差好遠，行出黎都唔同d。」報以一笑。

同檔的人對我有許多期望。當然，亦唔係個個都咁諗。

一切都來得很快，靜悄悄的，零七年未過，已經踏上了另一個舞台。

台下，我為自己準備了一副棺材。

***

之後，友人要我陪佢等佢既女友。我一個人在鬧市的街頭，東顧西盼，等了四十幾分鐘。很久都沒有如此這般等人的了。有人等放工/放學的女孩子是幸福的。我希望我認識的女孩子都會幸福。

總覺得，和愛人一起看聖誕夜看Love actually是一件幸福的事情。

又，你要一個男人忘記以前的女友是一件不太可能的事吧。如果有人話會，不要信。

希望你今個聖誕會過得幸福。

生埋仔....

都是facebook吧，與幾位失散多年的小學同學(都是女的)在網絡上重聚。老實講，我真係唔認得佢地個樣，都成十幾年冇見了吧。反而佢地仲可以認得我，係我細個個樣太老定係我而家個樣同細個個陣冇咩點變呢？

大家都是廿八歲吧，她們一個二個都結左婚，仲生埋仔。結婚呢家野對我黎講仲係一件好遙遠既事。我只知道未來九個月，目標只係得一個。

***

唔知我既前同事幾時會拉埋呢。呢位前同事話自從我識左佢之後(05年中認識既我地)就腳頭非常之好，轉工之後加薪又升職。咁既然冇機會請佢食飯，就係度講聲多謝吧。

***

上星期日發生係北角既事真係令人毛骨悚然，堂堂一個尊貴的竟然帶住一班人係度打人，可惜暫時冇人拍得當時既情況，而個幾位被打既人又唔肯企出黎......

令你害怕

是甚麼年代了？

就是要令你們害怕。

新的一頁

今晚成點先番屋企，阿媽子等我沖完涼就端上一碗熱湯。

我後悔沒有望著媽子就跟她說：

「阿媽(停頓了數秒)，我升左職。」

這是我人生第一次同阿媽講呢句說話，而當時我是望著碗湯同佢講的。

是時候了嗎？

這幾天是活埋在一大堆工作中，剛過去的星期日的善後工作仍未處理好，就要獨個兒去安排未來十一天的工作，還有星期六的面試，日常的工作呢？別提了，現在是給我一點點的警示嗎？

十二月二 日之後，我大概會知道未來一年的去向吧。這幾天腦海都轉過不停，人性善惡美醜都印在連繫一一一八的回憶中。我知道係呢一刻，做一個更高層又是對外的位置是與找死無甚分別，新工可以做一年抑或做多四年全繫在明年九月的另一場大型工程。打從心底想，如果組織可以找到一個比我更合適的人出任高層工作，我當然會全力支持有能者，而我會繼續係而家既崗位上奮鬥；如果董事們覺得我比其他人合適的話，那我定必傾盡全力，為組織打下一片江山。

今天我迷茫

眨眼就已經是十一月中了。這裡好像是荒廢了的樂園，也許在某一個角落，已經結了個蛛網。

我好耐都未試過好似今晚咁，訓唔著。寫呢個blog既時候，停左好耐，都唔知點寫，就好似有一大堆想法，不過就不知從何說起。是工作嗎？是感情嗎？可能，樣樣都有些吧。就好似樣樣野都去到一個交叉點，在左轉與右轉之間，等待紅燈轉綠燈的那一殺那。

這個多月就是一鼓腦兒的衝！衝！衝！一面忙著往前衝時，一面就好似要告別昨日的「我」。我最喜歡做甚麼呢？我是一個懶人，最愛在週未的下午與喜歡的人一起過日子，與喜歡的人在一起，「無事可做」也會很開心。不要說我不長進，如果一生可這樣，我認為是上天的最大的恩賜。

如果是一個人的話，最開心就是莫過於拿著筆係咁畫，畫一整天都冇問題。想想也叫人期待！

我是一個天真的人吧，覺得與世無爭是我最終極的依歸。現在獨個兒生活，好像沒有什麼包袱，最多，像一個如此的夜晚，會有一點衝動(沒有行動)去發一個sms吧。

***

上幾個星期，放學時在校園看見很多人在影畢業照，想起這幾年的聚散離合，難免令人唏噓。五年前的小鬼頭已經變成了人人都以為係三十幾歲的老骨頭。那時候在校園，就是喜歡交朋友；今天在班課裡，我只是獨來獨往，鮮有跟同學聊聊，別說交朋友了。班上有一個只愛跟女孩子聊天的肥仔，中段休息時就愛走來走去，到處派名片，好不威風。

成功不必在我

"I told him whether I could take up the job is not important if the party can get someone who can do better than me in addressing the issues we concern."

其實我也沒想過我們可以如此坦誠去交換彼此的想法。在這裡的幾位大哥大姐，是確實羸得我最真心的尊敬。


那個星期三的下午，會記著我心中的。