零七好像很遙遠

明明都已經是07年既10月尾，卻總覺得是仍活在06！早幾日，翻看06年11月的文件，原來快又一年了。好像有很多事未做。好吧，看看在剩下的兩個月，我還有甚麼事要做吧。

一一．一八：我希望下星期開始，放工後四圍去友好的地區幫手。在我好像忘記了該如何助選的時候，我的朋友都在港九新界努力拓展地區工作。未想過助選一、兩個晚上會有甚麼作用，最主要是給他們一點支持鼓勵，不論是職員的身份、會員的身份、還是朋友，現是都是身體力行的時候，順帶感受一下熾熱的氣氛。(新西太遠了，九西九東該是會常去的地方。)

家住大廈的大堂入口，貼了四張同一候選人的海報，另外的飯民候選人則一張都入唔到黎。個位候選人的海報設計都幾可怕，一張海報上面貼上候選人的超大頭相，清楚見到未刮得乾淨既show根，雙眼如豆，目光呆滯，正面望住張海報都咪話唔嚇人，特別海報是貼在每次行出lift門時眼球直射的位置。容許我做一個只看包裝的膚淺選民吧，呢個係我家住大廈貼左四張咁核突海報既候選人，我係唔會投票俾你的。

十二．零二：可以的話，我想多參與一點，始終明年我們都要參與。上司好像不太喜歡，著我不要在辦公時間幫手，令人納悶。

書房裝潢：已經一拖再拖，家陣間書房同睡房已經佈滿書本，一一一八之後會搵人睇下，報下價，拆下櫃，裝新櫃，整番個書桌，希望三萬以下埋單吧，因為手上只有10%的現金呀。

年宵

星期二，去左競投年宵檔，預感告訴我，我將會是呢個項目的負責人。去年既經驗係相當不愉快，當時負責既同事同老闆們有嚴重分歧，嚴重影響個別老闆對呢個同事既關係。個陣我專心準備緊步行籌款，所以係年宵的貢獻非常之少。由於去年既不快經驗，老闆們決定今年由我負責。我欣然接受，因為我非常珍惜每一個可以表現既機會。

我覺得老闆們既心態對呢個event十分關鍵，去年以賺錢為目標，今年當拎幾萬銀當出黎做宣傳好啦。去年做到大家都好辛苦，今年我希望可以令參與的會員同職員都覺得年宵係一個好玩既活動吧。

余秘書知道我投左個檔後，都不禁講左句：「你地年三十都冇得同屋企人過，咁而家同賣身有咩分別呢？」

***

有時為左個大局，就算唔係我份內要做既工作，我都會照做。特別係而家有幾個同事走左之後，人手緊絀，我要做更多本份以外既工作。上一次開staff meeting，我已經講左因為要兼顧其他較緊急的工作，所有我本身要做既工作會因應延遲。一同事居然將我工作延遲既事走去同主席講，不過佢當然冇話因為我要做其他野所以有delay啦。主席是一個單純的人，就此事向我上司表達不滿。上司同我講番，或者佢唔知道，咁講會令我非常失望。

令我失望既有三個人，一：同事，二：主席，三：我上司。

容不下

朋友正為事業疲於奔命，偏偏這時候，她出現了。朋友的感情生活經歷過好幾個波折，現在不介意單身，甚至都單身了好幾年了。他很介意隨意的展開一段感情，他知道，因了解而分手有幾痛苦。很多人都說，朋友的外表看似很花fit，和他一起會很不安全，因為他的外表，大有要識哂全世界的女子先心息既樣。這個比死罪好不了多少啊。

而她呢？比朋友年輕六、七年，不知怎的，卻喜歡了他。朋友的目標太明確了，而當中，未有一項是愛情。沒有人知道愛情幾時到來，不過朋友知道，現在不是開展一段感情的時候，如果勉強開始，一定會令對方不開心。她說她會等，等朋友事業有成時回來找她。

她想要朋友可以有多一點時間相陪，朋友知道，單是這一點，便已經沒有妥協的餘地。他自知是一個麻煩人，生人勿近，都是一個人比較好。

難得一晚靜靜的

總算從一連串的活動中活下來。

很久都沒出街做野了，適逢呢幾日就要出去，但這幾天天氣悶熱得叫人特別難受，在鬧市街上工作可真辛苦。昨天又見識過阿太的魅力。下午係鬧市活動，圍觀的人多，幫襯既人更多，才不過三十分鐘，已經可以賣去近一百把雨傘，如果不是要把把姐都要簽名又要影相，我相信可以賣得更多。昨天(6日)真是驚險，食環唔批我係某行人專用區的牌照申請，只准我去位置極差既Sogo巴士站度擺檔。

尋日，我手上拿住兩個牌照：
1) 10月6日有效既牌，但係位置極差，仲要狂食塵既巴士站位置，而且係銅鑼灣最污染既地方、
2) 10月16日有效既牌，位置係最理想既。

思前想後，我決定拿住10月16日既牌去尋日既活動。當日中午我亦通知各老細同傳媒活動位置有更改。

活動係下午2.30開始，3.00完結，食環2.00黎查我牌，澄清完一輪之後都已經係3.15分，輕舟已過萬重山。是次活動，偷雞成功。

今日，同樣係鬧市擺檔，今次既主角唔係阿太，係阿灰。市民見到佢，就好似蜜蜂咁湧住佢要佢既簽名，我係阿灰身邊望住市民瘋狂要攞佢簽名，而阿灰就360度被包圍，仍笑容不減。我見阿灰既老公好肉緊咁望實佢，令我好覺得阿灰做小鳥依人比做一個組織既阿灰更適合佢。

晚上，我暫時忘卻工作煩擾，好好的靜心看一看DVD，聽一下音樂。

生活太dry，就寫不出人生百態。

節奏

人人都有自己的一套生活節奏吧。

我的理想生活節奏近乎規條；最好是晚上十二時上床，早上七時起床，十時回到office之前已經吃過早餐，看完主要的港聞及財經新聞及做過適量的運動。八時放工，之後到圖書館溫習到十一時，回家聽一陣歌就十二時了。

近來的生活節奏給龐大的工作量打亂，連溫習既時間都沒有，卻花了兩晚時間看完一本人物誌。

是他。對於四十歲以下的一輩，對這個人不熟悉也不見怪。作者是羅的私人助理，羅建立的組織之總幹事。

書中紀錄了九七年前羅在政圈的人和事，其中有幾段幾有趣：

當時李福善正參選第一屆特手，人言報的專欄作家張立衝動魯莽的走上羅的律師樓要見李，羅不認識張亦不想見，便叫作者應付一下。作者初會張立，張「說了一番參選特手的理論和策略，....說得五滋六味，口沬橫飛，大有老夫助選，天下無敵之慨。」作者感嘆在政界打滾多年，見過不少這類登徒客。另一個故事，黃占替李攪宣傳，才不過兩星期的跑龍套竟索價一百萬，叫人嘩然。

我資歷尚淺，接觸面未必及作者廣，以上的經歷卻教我感同身受。當時的人和事，在另一個時空都不斷的重複著。

Holiday

今日本來要九點幾番去做野，最後我都要十一點幾先起到身。呢幾個星期都唔知咩事，一日痾，第二日冇事，第三日又痾，今日八點幾就胃痛到醒左，幾經辛苦最後都去左上環搵吉叔把把脈，之後就去左公司個活動。

雖然係個人唔係好精神，但係一去到活動現場就成個人醒哂，我好喜歡呢一種工作環境，人又多，又好多野要handle(不過我今日因病遲到，都冇咩要我handle)。活動完左之後，收到一份禮物，是一本書呢。呢本書我想買左好耐，不過又係冇時間買，書入面夾左一張寫上秀麗字體的書籤。

工作、讀書、儲蓄之外，係呢一個階段，我仲可唔可以容納更多？以前拍拖時，我可以大部份時間擺落感情度，今時今日，我唔覺得我可以再係咁。

下午返屋企，拎本書黎睇，一路播住Pink Martini Sympathique，就係咁，我又訓左著了.....

九月小記

看來我的blog可以叫作「網上月誌」了。好多謝仲有上黎呢度既朋友。

感情事．家庭事

一故事。p想同男友分開，不過全家上至阿嫲下至佢細路橫至e媽姑姊，都覺得個男仔外表敦厚，又做學術研究，有穩定收入，煞是一個標準老公的樣板，如果兩個有argue，家人都覺得係自己個女唔夠忍耐，唔識遷就人家。令p感到煩惱的，是男友會係唔開心既時候就搵野掟佢，又會打佢，不幸既係佢唔知點同家人講。如果佢真係冇分開到，都係因為唔想令家人失望。

希望呢個故事唔會有一個悲劇既下場。

投資

記得一個月前，中移動曾經跌到去76蚊嗎？轉眼間，豆腐渣已經變成燒鵝脾，股價已經升到$112.7，升50%。今日係百忙之中，都走左去樓下既匯豐更改月供股票既銀碼，下個月只供股$3,000，留起現金。

Too much

今日突然覺得好不安，工作同埋讀書已經令我吃不消，好似成個人失去左平衡一樣。

或者，只有咁樣，我先可以走出以前的陰影吧。

圖書館小記

每個地方、每個人都有一種獨特的氣味，不同的氣味往往會帶給我不同的感覺或者回憶。

我最喜歡到Poly拉記四樓期刊部讀書的，個度人較少，容易集中精神。今日重臨舊地，個度依然有好大陣「雜誌」味。圖書館有幾種味道的，有「書」味、「影印」味同埋「影音」味。本來我想去拉記備下課的，不過書架上既書更加吸引我(因為平時冇得睇！)，於是成個上午就係咁睇書，差d連堂都唔記得想上。

有篇好令我震撼的個人專訪，就叫被訪者做L吧。L同我對金錢既方法都好一致，就係「金錢是生活的保障，而不是追求享受。取之予，用之予。」。L成立左私人基金，除左基本生活費及教育費外，不打算將家財留給下一代，以鼓勵佢地積極做人。不過，如果佢地想參政，基金會撥款支持競選。L說，這是參考美國甘迺迪家族的做法。當年佢見到程戒南當年因為幾萬元而身敗名裂，感到可惜，佢話：「...希望兒子參政的話，不須依賴任何財團既支持，亦不需要高官勾結，真正做一個有良心、為香港利益的政治家。」睇完之後不禁倒抽一口涼氣。

環觀香港的政治圈，資源豐富的親政府陣營沒有勇氣去突破既定的框架，另一陣營雖然得到大部份的港人支持，不過就欠缺資源，以政治為終生事業的年青一代更加欠缺前景，欠缺所屬陣營的財政支持。青年人以從政為事業，收入極可能會唔及同年紀既人多。人到中年，一比之下，自卑感油然而生，亦慢慢減低對金錢的誘惑。我認為係呢個環境，任何人決定以政治為事業(不是職業)之前，必定要有一個穩健的財政基礎，足以解決一個有尊嚴的生活所需(包括個人及家庭)，更理想係已經達到「財務自由」，成為金錢誘惑的絕緣體。呢部份講住咁多先。

講番今日係圖書館，覺得自己對知識好hungry，好似一舊棉花咁係咁吸係咁吸，而且呢舊棉花係好快樂的。

不夠別人聰明，唯有以「勤力」同埋「持之以恆」黎搭夠！

將相本無種，男兒當自強。

睡眠

有些朋友經常失眠，眼光光等天光。

我好耐都冇失眠了，一係就坐係書房訓左覺、一係就係廳聽歌聽聽下訓左覺，又或者係床上睇書睇到訓左。

人家話容易訓得著既人係幸福既，因為有些人一生都不得安眠。