放假一天！

放假係心情應該好既，不過今朝起身既時候好唔開心，係一醒就唔開心個隻，其實近黎既心情麻麻地，呢個星期又唔溫書又唔睇番d數，迷迷茫茫，連update下blog既動力都欠奉。

今日比平時早左起身，由於好煩，於是取消原本既溫習大計，決定到出面走走，第一站係屯門藍地。

今日完全唔趕時間，揀左由青衣坐巴士入去，又唔睇地圖咁就上左車，好似細路仔去遊行咁，沿途見到好多我平時唔會到既地方，又有好正既風景睇，好鬼爽！

去完藍地，就搭輕鐵走，嘩，我好似好耐冇坐過輕鐵，差d上錯車，我真係大鄉里呢！之後就轉巴士番屋企，不過見架車係去佐敦，咁就順便去我最愛既牛屋幫襯。放假就係咁，如果冇特定既野做，就會想去邊就去邊，如果去旅行，我都係鍾係想去邊就去邊，懶係浪蕩咁。

本來想食完野就去九龍中央，不過我係中華書局買左兩本書，之後就番屋企。個兩本書好有趣，一本係講紫禁城既設計，好多圖，可以等我慢慢研究。



本書令我想起蔣先生，佢當年讀建築，就係因為個外國lecturer講唔明古時中國既宮廷既設計原理俾佢聽，令佢有「民族自卑感」，於是發奮自學，亦因此而認識了王亭之先生，並拜王老先生為師。中州派除左斗數外，仲有「玄空風水」，而中國既宮廷設計就係由「玄空」演繹出黎。講開斗數，與蔣同門既師兄弟葉漢良出左一本有關斗數既書，係講安星既，黎緊仲會出多八本，好期待！好想知有咩「與時共進」既新發現。

之前有朋友睇左我篇講斗數既文，問左一條問題：「既然話唔係整定，如果算出有意外，就一定有意外，咁都係整定in some sense啦。」

於是番去摷下書，嘗試答一下呢條問題：

1 x 1 = 1,
(-1) x (-1) = 1,
1 x 1 x (-1) x (-1) = 1

係數學上黎講，同樣都係1，不過可以有幾個唔同組合既計法。如果算出某時有「血光之災」，可以係車禍、刀傷等，但都可以係被紙界傷，一個常積福既人可以割傷手指，一個作惡既黑社會人物就會被刀傷。

談錫永先生在《生與死的禪法》第52頁，有呢一段說話，我節錄落黎，或者可以為我朋友既問題提供一d指引：

「輪迴界的一切生死現象的顯現，無不如此，他們在自決定的業力網中生死輪迴，一切都是業力運作，因此佛家雖說因果，但卻反對宿命。宿命是冥冥之中有一個不可抗拒的力量在運作，沒有一個生命體可以改變或逃避。「緣起」則不然，可以由自力來創造客觀條件，由於客觀條件不同，因此雖同一因，亦可以結成不同的果。」

術數係「小術」，唔係萬能，斗數算祿命起伏，玄空算一地吉凶，僅此矣。

***

之前問過人，如果富貴竹成個月都唔出根，就要掉左佢買過第二棵種，不過我唔想咁快放棄，始終都有緣份吧。早幾日，我幫擺係廳既富貴竹除去哂d黃葉，換過d水，希望佢可以好似屋企另一棵咁生根啦。

遲來的大掃除

訓左碌架床下格都好多年，上格原本係俾阿哥訓既，不過佢而家都搬左出去，而家係俾我放玩具盒同雜物。呢幾日，我決定要轉換下環境，由下格升上上格，至於點解要咁做，就唔方便係度講啦。

本來想放左工就早d返去執房，不過又係臨放工先有一大堆野做，要成九點幾先走人。

十一點幾，媽子同我夾手夾腳咁清哂上格床既雜物，包括：玩具盒、PS2、衫、漫畫書....而且仲有兩袋中六、七時候既notes。屋企唔係好夠位放咁多以前既野，我翻了幾翻，留番最愛既chem notes，其他就要大部份扔掉，大學時代既Building Technology, Value Management等等，都要同佢地講拜拜。

明晚，我會上上格床訓，如果要再買床既話，都唔會再選擇碌架床。

話時話，今年我係屋企既廳同主人房放左兩盤富貴竹，一個月以還，一盤就出左根，另一盤就未出根，而且仲有d變黃，唉，呢幾日又唔得閒，如果唔係就會去花墟問下點樣處理變黃左既富貴竹呀。

***

查實我而家係好攰，唔係好知我寫左d咩，成日都係咁，好似好多野想講，不過都唔好講咁多吧。

I Love This One!

(with courtesy to 歇斯底娜)

我的野蠻朋友

尋日做左一日勞動，超級攰，諗住去完個聚餐就返歸是也。

係聚餐見番個好熟既朋友，阿泉，佢同男友分左手，好傷心，而家同個ex係番埋，不過個ex又有女友，d關係好混亂。佢仲係好鍾意男友，但係因為做左一d令佢個男友接受唔到既事而要分手，於是佢好失落，好想放縱，前晚仲同個ex既一個朋友過左一晚。佢同我講，個男的仲係身處呢個場！我尋晚真係好忙，成晚走黎走去，但係聽完佢既故事之後就令我好擔心，我叫佢食完飯等我同佢去飲野，坐底傾下，點知佢笑笑口，用一個唔正經既話氣同我講，佢今晚又約左人了。我同佢都識既朋友都坐哂係佢附近，所以我好留意有咩我唔識既人行埋佢度，大家都知道佢今晚有d唔妥。

散場，阿泉已經狂隊左好多紅酒，飲到醉醺醺，跟住佢行埋一個男仔度，個勢係要走咁樣，我心知不妙。我其他既朋友都好關心呢位阿泉，因為佢年紀好細，而且佢亦好得大家既疼愛。佢地都落左大堂，於是我打俾佢地，叫佢地幫我睇住佢，如果見到佢同男仔一齊出黎就捉住佢先，等我跟埋d手尾先再睇下點處理。

落到樓下，果然個男仔仲係度，之後我送阿泉番屋企。佢極之唔想番屋企，仲狂講粗口，不過我想聽慣佢講，唔在乎矣。架的士行左一陣，我見佢真係唔係好得，有「劏」既徵狀，於是急急叫司機轉去貨倉。

唉，佢一落的士，已經訓左落地下，我唔理得咁多了，揹左佢上去倉個廁所。老實講，佢係繼我阿哥之後，第二個咁近距離係我面前「劏」既人，加上佢係長髮既..........(有緣再續)

瓜

不知從何時開始，一個人行街，一個人逛書店，一個人看電影，一個人在圖書館，一個人寫blog，一個人吃飯，一個人蕩唱片鋪，一個人面對得失進退。曾經由一日發十幾個sms到今個月只打一、兩個，都係祝朋友生日快樂矣，少打了，生手了。還好，朋友發sms時有個別字不懂打，我每次都可以打得到，大概是「爛船都有三分釘」，可見之前的用功。

這幾天心情不太好，想必是天氣的錯吧，是的，這幾天太大霧，看不到國金，看不見天空。

「單身」久了，別人都愛給我開玩笑，就好像小學三年級的時候，請女孩子吃零食就會被誤以為是想追求人家一樣，放學後和女生一同離開校園就會被同學認為明天會生埋bb一樣。

環顧四周，還有幾多女孩子是單身？仍是單身的又有幾多個我會喜歡？而人家又喜歡我呢？

大慨是...

零。

斗數淺談

迷信？唔科學？古老？

或許，很多人對「紫微斗數」的第一個反應就是如此。我亦相信，江湖上有不少神棍以此招搖撞騙，故弄玄虛，不過，只要你輕輕掀開斗數的神秘面紗，發現原來斗數是一門集合天文、地理、數學、重推理邏輯又講驗證的中國傳統科學！

人的一生，就反映在一個分成十二宮的命盤上。十二宮依次為：命宮、兄弟、夫妻、子女、財帛、疾厄、遷移、交友、事業、田宅、福德、父母。每一個宮掌握一個人該代表宮垣的整個人生及十年大限的運程，而每個宮垣逢每一大限(十年)或流年(一年)轉動一次。

故此，學斗數就是要學：

一：安星；
雖然現在可以上網查表(中州派網站：www.kankanwoo.com)，不過前輩都說要學識口訣，懂得以人手起盤方為正路。

二：星曜的特質；

三：用星盤來推斷運程；

如果要看一個人的命格，不能單看命宮，還要看其三方正四，即對宮及夾宮的星曜互動。

例如：觀察命宮，而命宮的三方四正為：遷移(對宮)、財帛(夾宮)、事業(夾宮)；夫妻的三方四正為：事業(對宮)、遷移(夾宮)、福德(夾宮)。

觀察命宮時，除了留意三方四正外，亦要同時觀察父母宮、田宅宮及福德宮。若父母宮及田宅宮都不佳，但命宮奇好，則可能是一個白手興家的格局，反之，若父母宮及田宅宮俱佳，但命宮不好，則家庭必遭崩敗。福德宮主精神享受，精神不佳，可能是夫妻感情不佳(要留意夫妻宮，並推算流年感情起伏)，又或者宿疾纏身等等。

***

因果業力對人的影響甚鉅(因果唔一定係你打人一拳，你第日俾人打番一拳咁庸俗，因果可以理解為種子，種善因，得善果，惡的種子沒有水份、營養、泥土就不會生長，反之，多行不義者就為惡的種子提供了充足的水份、營養、泥土，待緣份一到，時機成熟，必會開花結果！)，王亭之先生在《王亭之談星》中有一個案，一女士因車禍受傷，性生活受影響，丈夫因而變心。作者說：「...除了那幾天小心之外，若能修身立德，做點善事，並以濟物利民為抱負，則身體創傷固然最少亦可減輕，同時婚姻生活應不致如現時的惡化。」由此，斗數並不相信宿命，並不相信「整定」。

就算不去推算，人人亦可避凶，王老先生在《斗數四書(四)》中，有一段說：「...佛家認為業力可轉化，重業可以輕報，只要心存忠厚，以誠待人，兼且立身行事俯仰無愧，則運勢應該可以扭轉。....應重視精神修養，則忌星亦無能為力，假如放任，聽其自然，而毫不作內心準備及加以修養補救者，於橫逆來時，不得不謂之「整定係咁」。」

朋友，請自重！

生活的全部

構成我生活既成份：

星期一至五

55% 工作(同人講我係某機構做，咁人地就會問，咁你究竟做d咩呢，唔，做阿四囉。)
30% 睡眠
15% 私人時間，包括晚飯、聽歌、閱讀及其他

星期日(如果不需要工作的話)修心養性，閉關自守

午飯前上網睇下NBA既戰果，去wiser睇下新聞，search下有冇錯過d咩新聞，特別會search下已持有及想持有的股票新聞。RTHK的LTV Cafe係星期日上午必定重聽既節目。瀏覽下人家既Blog。睇下星矢有冇新玩具出。

午飯時睇DVD，視乎之前一晚租到咩碟。如果租唔到新片，就會睇番屋企既舊片。

下午會閱讀，兼聽住碟去讀(CD包括：衛蘭的 do you know where I am going to、貝多芬第九、Jazz等等，聽方大同就比較難集中)不過通常會三、四點睇睇下書訓著左。

晚飯之後會睇書，不過冇得聽歌，因為阿媽十點要睇大話妹。

***

睇星期六既生果報上芝c姑bi的專欄，覺得幾有趣，節錄如下：

「上一輩看著新時代來了，年輕一輩視舊規矩如無物，只剩下一陣無奈、無力感和空虛感。...我一直以為，20多歲的人，該義無反顧爭取改革，但當我遇上比我更年輕的人，實情變得面紅耳熱，忽然覺得自己原來是老派人了。CD，唱片。世上沒有一「隻」CD的，只有一「張」CD，正如也沒有一「隻」歌，只有一「首」歌。話說那天我見電台直播室的控制人員拿著一張唱片，正確點說是用手指夾著一張唱片。他的拇指在唱片面，食指、中指、無名指與尾指緊貼唱片底，就像你拿著一張紙一樣。他的手指模全都印到唱片底──閱讀面──來了，我嚇死，急教他標準的拿CD方法：食指穿過勾著唱片中心的圓圈位，拇指靠著光碟的邊緣，這樣一來，中指、無名指與尾指根本是凌空的，亦不會有任何一隻手指會觸摸到唱片底。我很驚訝他連唱片也不懂得拿；他很愕然我竟然會對此長篇大論。

兩天之後，我又見到他，偷看之下發現他拿CD的方法，又回到從前了。我跟朋友說，或許是我多餘吧，其實CD底印了手指模，並不會直接令唱片跳線的....人地而家開MP3啦……我忽然覺得，自己所謂的標準手持CD方法，很像皇室堅持不降的那面旗；你老人家在堅持，他人暗笑你傻瓜。我只知道以前給陳輝虹看到我把指模印到唱片，實死冇生的。唉，我又再來一招想當年，我是老了。時代變得太快（單是我這年齡，已經經歷了卡式錄音帶→CD→MD→MP3），一旦人停留在某一個年代，老是認為某一個時代的東西是最好的，就會覺得自己是老派人了。其實呢，無論你幾多歲，都有權覺得自己老；老，只是一種感覺，或是一種情懷吧。」

唔，細個時知道一張CD很貴，聽CD時會小心翼翼，不敢揩花。今天的CD是便宜了，不過見到人家「拇指在唱片面，食指、中指、無名指與尾指緊貼唱片底，就像你拿著一張紙一樣。」時，我都會痛心的！原來，這就可能是一個年代的印記。

記得個時聽收音機，先知道我同佢係同一年考會考的。

***

而家，好容易就過左一個星期，就係咁，一切都好似無事好記。

***

真係估唔到我會走去自學，輕輕揭開左佢既神秘面紗之後，原來箇中係有咁大趣味。

新年新開始？

小感冒係尋日已經釀成大感冒，再過多日，等我多d休息，就應該會好番；但係工事上既小問題，一日唔處理，日後就會釀成災難！

過多幾個月，我就會有一位新同事，而呢位同事將會代替我上司既位置，其實這個是一個可預計的結局，差在幾時發生矣。而另一位女同事，相信都會好快離開呢個office。

始終都共事過一排，離別，傷感難免。人來人去，效率會因此而提高嗎？不知道。

未來工作量和壓力會因此增多，唔，有一點還有待驗證。

***

今日股市有小波幅，只不過趺得個係幾百點，收市仲係一萬九百幾點，未有平貨執，即係仲未係入市既市機，趺多幾千點，就係入市既時機了，估計係五月尾前個浪就會黎，各位朋友要小心。不過如果你持有既係匯豐(005)同宏利(945)，就唔同講法。

***

早幾日同個朋友提過下本好貴既講義，朋友尋日打俾我，話：「Jeffreality，你估我買左d咩？」原來佢買左一本講義番黎！今日見到佢老公，佢仲話佢老婆不嬲都想買本講義架啦，而家俾我再講一下，前日忍唔住買左，佢睇住老婆買既時候眼都突埋，成千幾銀本書！我唔敢同佢講，其實仲有本深造講義賣二千五百幾銀.....

小感冒

早幾日先同自己講好耐冇傷風感冒，點知星期六晚就開始鼻塞塞，星期日就喉嚨痕。尋晚已經一點就訓左，點知今朝完全無視電話的響鬧，要九點幾先起身(要明白，平日個電話係七點半響而九點幾係出門口既時間！)，真係糟糕！返到office，感覺係好攰，無咩力咁(雖然我外表係好精神！)，今日都主要係處理過年前積落既工作同埋清理枱頭既垃圾。

今年既工作方向係小說話，多做事；少批評別人，多自我檢討。

記得有朋友埋怨我成日做錯決定，我就話一日未埋單，一日都未知當日既決日係錯定啱，好多以為係對既決定唔一定係對，好多可能係錯既決定可能又未必係錯。阿哥係我呢個年紀時就話要有個不平凡既人生，我呢，意氣風發既時候有過，摺埋既時候都有過，高低趺盪，波瀾有餘，壯闊不足。一年前，我正為轉工既事煩擾，今日，工就轉左，一切尚好。而家就保持低調，做好份工。

唔知大家有冇睇過《悠長假期》呢？朋友話唔睇過呢套劇就唔識追女仔喎。低潮個排就買左呢套劇睇，劇中有段野好似係咁講：「當你生活唔如意既時候，放自己一個悠長假期吧！你可以咩都唔做，咩目標都冇，好好休息，做自己想做既野，當機會來到，你既假期就會結束，而到時，生命就掀開新既一頁！」戲就睇完左，又唔覺得我識得追女仔左，只係記得以上個段情景。

小感冒繼續困擾我，今晚睇一陣書就早d訓。

休息，永遠都係為走更遠既路。

自修室

昨日中午得去沙田圖書館一趟。

途經大圍火車站，這裡好像比以前大了，是為馬鐵而擴建嗎？

噢，原來新城市都裝潢過啦，到處都美輪美奐，名店林立，感覺是熟悉但陌生，不知有多久沒有來過這裡。

在一樓參考書館借了書，找了個位子坐。這裡的座位沒有大會堂那邊寬敞，攤開書本後要小心翼翼的把筆記本和文具放好，免得「霸」去別人的地方。好了，一切都準備好，可以開始，望一望時鐘，順勢掃到鄰近的朋友身上，噢，全都是十幾歲的年青人呀，我好像是比較大年紀那一位，有點不好意思，嗯，是考試的季節吧，前後左右的座位上都是會考的試題本，年青人都在準備公開考試。沒法子，香港只有三間公共圖書館藏有此書，不可外借，我又買不起，只好和你們爭一爭位置了。

這裡的朋友不是個個都把電話轉到「靜音摸式」，偶爾都有電話聲響起，好不滋擾。為甚麼這一點基本的尊重都不懂呢？坐在我對面的朋友，整天在對著我打呵欠(因為我不是女生吧！)，又不用手掩著(都是因為我不是女生吧！！)，好難受！

初級講義共三百多版一百幾十頁價值一千六百元。真是對不起作者，我打算把此書影印。今天在圖書館的影印機處影印了幾十頁，不可以一次影完呀，免得圖書館管理員制止我呀(沙田比大會堂好一點，大會堂圖書館的管理員叫我不可以影印及抄寫書內的資料！)！明天會去一去香港中央圖書館。

離開圖書館，突然間，學生時代個種去自修室讀書既感覺又返番黎。好想可以重返校園，全心咁學習做學問，始終要返工就難好集中精神讀書(放左工返屋企就想聽歌)。算吧，面對現實，家庭環境唔許可，就得硬著頭皮去吧！

***

晚上看了《Death Note》和《黃金甲》的dvd，前者好緊湊，劇情又真係估佢唔到喎，而個下心臟麻痺既重Bass好正，震到個廳既窗簾都郁郁下，有哂共震咁！想想下，好似之前係屋企見過呢套漫畫.....至於後者，就得個場面壯麗，劇味就麻麻，始終都係喜歡張導演的早期作品《搖呀搖，搖到外婆橋》、《大紅燈籠高高掛》、《我的父親母親》、《一個都不能少》同埋我最愛既《活著》。如果有呢幾套片既珍藏DVD，我會全部買下。